މި އެއްބަސްވުން ވެފައިވަނީ އެންވަޔަރަމަންޓް ޕްރޮޓެކްޝަން އެޖެންސީ (އީޕީއޭ) އާއި ނިއުޒިލޭންޑްގެ ޔުނިވާސިޓީ އޮފް އޯކްލެންޑާ ދެމެދު ކަމަށް އެންވަޔަރަމަންޓް މިނިސްޓްރީން ބުނެއެވެ.
މިއަދުގެ ވަގުތެއްގައި މި އެމްއޯޔޫގައި އީޕީއޭގެ ފަރާތުން ސޮއިކުރެއްވީ އެންވަޔަރަމްޓް މިނިސްޓަރު ތޯރިގް އިބްރާހީމްއެވެ.
މި ޕާޓްނަޝިޕްގެ މަގުސަދަކީ މޫދު ސަރަހައްދު ދޫނިތަކާއި ހިޖުރަކުރާ ދޫނިތަކާ ބެހޭ ދިރާސާތައް ކުރުމުގެ ގާބިލްކަން، އީޕީއޭގެ ގާބިލްކަން އިތުރުކޮށް، ދޫނި ބިސް އަޅާ ތަނާއި، ދޫނި ނިދާ ސަރަހައްދާއި އަދި ކާނާ ހޯދާ ތަންތަން ފަދަ މުހިއްމު ދިރިއުޅޭ ތަންތަން ދެނެގަތުން ކަމުގައި އެންވަޔަރަމަންޓް މިނިސްޓްރީން ބުނެއެވެ.
މޫދު ސަރަހައްދު ދޫނި ދިރާސާކުރުމަށް އެއްބަސްވުމުގައި ސޮއި ކުރުން
ދޫނި ދިރިއުޅޭ މާހައުލު ރައްކާތެރިކުރުމުގެ އިތުރުން ދޫނި ބިސްއެޅުމާއި އެއެއްޗެހި ނިދާ ހަދާ ރަށްތަކަށް ނުރައްކާވާ ނުވަތަ ގެއްލުންދޭ ދިރޭތަކެތި "އިންވޭސިވް ސްޕީޝީސް" ގެ މައްސަލައަށް ވެސް ހައްލެއް ގެނެސް އެ ސަރަހައްދުތައް ރައްކާތެރި ކުރުމަށް "ލޯކަލް ކޮންޓްރޯލް" އަށް މަސައްކަތް ކުރާނެ ކަމަށްވެސް އެ މިނިސްޓްރީން ބުނެއެވެ.
މި އިސްނެގުމަކީ ރާއްޖޭގައި ތިމާވެށި ހިމާޔަތްކުރުމާއި ބަޔޯޑައިވަރސިޓީ ހިމާޔަތްކުރުމަށް އެޅޭ މުހިއްމު ފިޔަވަޅެއް ކަަމަށް އެ އެންވަޔަރަމަންޓް މިނިސްޓްރީން ފާހަގަކުރެއެވެ.
