ޕްރިމިއާ ލީގުގައި އާސެނަލްއާ ޔުނައިޓެޑު ކުޅޭ މެޗު އޮންނާނީ މިރޭއެވެ. މިރޭގެ މެޗާ ގުޅޭ ޕްރެސް ކޮށްފަރެންސްގައި އާޓެޓާ ބުނީ، ލީގު ރޭހުން ޔުނައިޓެޑު ބާކީ ކުރަން އަދި މާ އަވަސް ކަމަށެވެ. ޔުނައިޓެޑުވަނީ ލީގުގައި އެންމެ ފަހުން ކުޅުނު މެޗުން މޮޅުވެފައެވެ. އެކަމަކު ލީގު ޓޭބަލްގެ އެއްވަނައިގައި އޮތް ލިވަޕޫލަށް ވުރެ ޔުނައިޓެޑު އޮތީ 15 ޕޮއިންޓް ފަހަތުގައެވެ.
އެއްވަނައިގަ އޮތް ލިވަޕޫލަށް 13 މެޗުން 34 ޕޮއިންޓް ލިބިފައިވާއިރު، 13 މެޗުން 19 ޕޮއިންޓާއެކު ޔުނައިޓެޑު އޮތީ ނުވަވަނައިގައެވެ. އާސެނަލް އޮތީ 13 މެޗުން 25 ޕޮއިންޓާއެކު ޓޭބަލްގެ ދެވަނަ މަގާމުގައެވެ.
ޔުނައިޓެޑު ލީގު ރޭހުން ބާކީ ކުރަން މާ އަވަސްކަމަށް ބުނެ، ދެން އާޓެޓާގެ ވާހަކަ އަމާޒު ކުރީ ސިޓީއަށެވެ. އާޓެޓާ ބުނީ ޑިފެންޑިންގ ޗެމްޕިއަން މެންޗެސްޓާ ސިޓީ ފަހަކަށް އައިސް ދަށަށް ދިޔަ ނަމަވެސް އަދިވެސް އެއީ ނުރައްކާތެރި ޓީމެއް ކަމަށެވެ.
ލީގުގައި މިރޭ ޔުނައިޓެޑާ އާސެނަލް ކުޅޭއިރު، އެފްއޭ ކަޕުގެ ތިންވަނަ ބުރުގައި އަންނަ މަހު ކުރީކޮޅުވެސް މި ދެ ޓީމު ބައްދަލުކުރާނެއެވެ.
