މިނިސްޓަރު ވަހީދު ވިދާޅުވީ ނެޕް ޕްރޮގްރާމުގައި މިހާތަނަށް 400 އަށްވުރެ ގިނަ ޒުވާނުން ބައިވެރިވެފައިވާ ކަމަށާއި، އޭގެ ތެރެއިން ދެ ސަތޭކައަށްވުރެ ގިނަ ޒުވާނުން މިހާރު ތިބީ ވަޒީފާގައި ކަމަށެވެ. މި ޕްރޮގްރާމް ހިންގަނީ އަމިއްލަ ކުންފުނިތަކާ ގުޅިގެން ކަމަށާއި، ސަރުކާރަށް ބަރޯސާ ނުވާ ކަމަށް އެ މިނިސްޓަރު ވިދާޅުވި އެވެ.
ނެޕް ޕްރޮގްރާމުގެ މައިގަނޑު މަގުސަދަކީ މަސައްކަތްތެރިކަމުގެ ދާއިރާގައި މިހާރު ހަރަކާތްތެރިވާ ބިދޭސީންގެ އަދަދު މަދުކޮށް، އެ ވަޒީފާތަކަށް ހުނަރުވެރި ދިވެހި ޒުވާނުން ނެރުމެވެ. މި ޕްރޮގްރާމުގެ ދަށުން ތަމްރީނުތައް ކުރިއަށް ގެންދަނީ ޓޫރިޒަމް، ދަތުރުފަތުރު، އިމާރާތްކުރުން، އިޖުތިމާއީ، މަސްވެރިކަމާއި ދަނޑުވެރިކަން އަދި އައިސީޓީ ދާއިރާތަކަށެވެ.
މި ޕްރޮގްރާމް ފުރިހަމަކުރާ ފަރާތްތަކަށް ގައުމީ ސަނަދު ދޫކުރާ ކަމަށާއި، އެއީ ސަރުކާރުން ގަބޫލުކުރާ ފެންވަރުގެ ތަމްރީނެއް ކަމަށް މިނިސްޓްރީން ބުނެއެވެ.
