
ލޯބިވެރިޔާގެ ބަރަހަނާ ފޮޓޯތަކެއް ލީކްކުރާނެކަމަށް ބުނެ ބިރުދެއްކި މައްސަލާގައި ހައްޔަރު ކޮށްފައިވަނީ އއ. މަތިވެރި / ފަޒާ އުމުރުން 19 އަހަރުގެ ޒައިދާން މުހައްމަދު އެވެ. އޭނާއަކީ އެރަށު ޕޮލިސް ސްޓޭޝަންގައި މަސައްކަތްކުރާ ރެކްރޫޓު ފުލުހެއް ކަމަށް ދިވެހި ފުލުހުންގެ ހިދުމަތުން ބުނެއެވެ. މި ފުލުސް މީހާ ހައްޔަރުކޮށްފައިވަނީ ކޯޓް އަމުރެއްގެ ދަށުންކަމަށް ފުލުހުން ބުނެއެވެ.
ފުލުހުން ބުނީ އެ ފުލުސް މީހާ އޭނާގެ ލޯބިވެރިޔާއަށް ބިރުދައްކާ ލޯބިވެރިޔާގެ އޮރިޔާން މަންޒަރު ދައްކުވައިދޭ ފޮޓޯ އާއި ވީޑިއޯ ސޯޝަލް މީޑިއާގައި ލީކު ކޮށްލާނެ ކަމަށް ބުނެ ބިރުދައްކާ އިންޒާރުދީ، ބްލެކް މެއިލްކުރި ކަމަށް ތުހުމަތު ކުރެވޭކަމަށެވެ.
މީނާގެ ބަންދާ މެދު ގޮތެއް ނިންމުމަށް އއ. މަތިވެރި މެޖިސްޓްރޭޓް ކޯޓަށް ހާޒިރުކުރުމުން އެންމެ ފުރަތަމަ ތިން ދުވަހަށް ބަންދުގެ މުއްދަތު ޖަހާފައިވެއެވެ. އޭގެ ފަހުން އޭނާ މާލެ ގެނައުމަށް ފަހު ދެ ފަހަރެއްގެ މަތިންވަނީ ބަންދު މުއްދަތު އިތުކޮށްފައެވެ.
ފުލުހުން ބުނީ މައްސަލަ އިތުރަށް ތަހުގީގުކުރަމުންދާ ކަމަށެވެ.