
މޫސުމީ ބަދަލުތަކުން ކުރާ އަސަރުގެ ސަބަބުން ރައްޔިތުން ދިރިއުޅޭ ރަށް ބަދަލުކުރުމާ ސަރުކާރު ދެކޮޅު ކަމަށް ބަންޑާރަނައިބު އަހުމަދު އުޝާމް ވިދާޅުވީ މޫސުމަށް އަންނަ ބަދަލުތަކުގެ މައްސަލައިގައި ގައުމުގެ މަސްއޫލިއްޔަތުތަކާ ގުޅޭގޮތުން އިންޓަރނޭޝަނަލް ކޯޓް އޮފް ޖަސްޓިސް، އައިސީޖޭގައި ބޭއްވި އަޑުއެހުންތަކުގައި ރާއްޖޭގެ ފަރާތުން ދެއްވި ބަޔާނުގައެވެ.
މި މައްސަލައިގައި ކުރިއަށްދާ އަޑުއެހުންތަކުގައި ބައިވެރިވެ ބަޔާން ހުށަހެޅުމުގެ ފުރުސަތު ގައުމުތަކަށާއި ބައިނަލްއަގުވާމީ ޖަމުޢިއްޔާތަކަށް އައިސީޖޭއިން ވަނީ ހުޅުވާލާފަ އެވެ. މޫސުމަށް އަންނަ ބަދަލުތަކުގެ މައްސަލައިގައި ގައުމުގެ މަސްއޫލިއްޔަތުތަކާ ގުޅޭގޮތުން އިންޓަރނޭޝަނަލް ކޯޓް އޮފް ޖަސްޓިސް، އައިސީޖޭގެ އިސްތިޝާރީ ލަފަޔަކަށް އެދި އ.ދ.ގެ އާންމު މަޖިލީހުން ވަނީ މައްސަލައެއް ހުށަހަޅާފަ އެވެ.
ބަންޑާރަ ނާއިބުވަނީ މޫސުމަށް އަންނަ ބަދަލުތަކުގެ މައްސަލައިގައި ކެނޑިނޭޅި ވަކާލާތު ކުރެއްވުމުގައި ރައީސް މުއިއްޒު އިސްނެންގެވުން ފާހަގަކުރައްވައި ރާއްޖެފަދަ މޫސުމީ ބަދަލުތަކަށް ނާޒުކު ގައުމުތަކަށް ބައިނަލްއަގުވާމީ މުޖުތަމައުން އެހީ ފޯރުކޮށްދިނުމަށް ގޮވާލައްވާފަ އެވެ.
މޫސުމީ ބަދަލުތަކުގެ ސަބަބުން ކުރާ ނޭދެވޭ އަސަރުތަކުން އަރައިގަތުމަށް ބައިނަލްއަގުވާމީ މުޖުތަމައާ ގުޅިގެން މަސައްކަތް ކުރުމާއި ރައްޔިތުންގެ ހައްގުގައި ވަކާލާތު ކުރުމުގައި ދިވެހި ސަރުކާރުން ސާބިތުކަމާއެކު ދެމިތިބޭނެ ކަމުގެ ޔަގީންކަން ބަންޑާރަނައިބުގެ އޮފީހުން ދެ އެވެ.