ފައިސަލް ނަސީމް މިހެން ވިދާޅުވީ "ގާނޫނު އަސާސީގެ ދިފާއުގައި"ގެ ނަމުގައި އެމްޑީޕީން ސިލްސިލާކޮށް ބާއްވާ ޖަލްސާތަކުގެ ތެރެއިން މިރޭ ވިލިމާލޭގައި އޮތް ކަންމަތީ ޖަލްސާގައި ވާހަކަދައްކަވަމުންނެވެ.
ފައިސަލް ނަސީމް ވިދާޅުވީ ފެންނަނީ އެތައް ބައެއްގެ ގުރުބާނީއާއި މިންނެތް މަސައްކަތުން ގެނައި ގާނޫނުއަސާސީ ބާބަކަށް ފަހު ބާބަކުން، މާއްދާއަކަށް ފަހު މާއްދާއަކުން ގެއްލިގެން ގޮސް 2004ގެ ކުރިން ރާއްޖޭގެ ހިންގުމުގެ ނިޒާމު އޮތް ގޮތަށް ފުރޮޅިގެންދާ މަންޒަރު ކަމަށެވެ.
ފައިސަލް ވިދާޅުވީ ރާއްޖޭގެ ރައްޔިތުންގެ ބުރަ މަސައްކަތުން އެތައް ހިދުމަތެއް ކޮށްގެން، ރެއާދުވާލު އެ ކުރި މަސައްކަތުން ގާނޫނުއަސާސީ ހޯދީ ތިންބާރު ވަކިވެފަ އޮތް ނިޒާމަކާއި، މިނިވަން މުއައްސަސާތަކެއްގެ އިތުރުން ރިޔާސީ ނިޒާމެއް ހޯދުމަށްކަމަށެވެ. އެހެންނަނަމަވެސް މި ސަރުކާރުން ގާނޫނު އަސާސީ އިސްލާހުގެ ކުރުމުގެ ނަމުގައި ފެންނަނީ އެ އުސޫލްތައް ގަޑުބަޑު ކުރާތަންކަމަށް ފައިސަލް ވިދާޅުވިއެވެ.
ފައިސަލް ނަސީމް ވިދާޅުވީ ގާނޫނު އަސާސީއަށް ގެނައި އިސްލާހުން މަޖިލިހަށް ރައްޔިތުންގެ މަޖިލީހޭ މިހާރު ކިޔަން އުނދަގޫކަމަށެވެ. ސަބަބެއްކަމަށް ވިދާޅުވި ރައްޔިތުންގެ މަޖިލީހަކީ ރައްޔިތުންގެ ކަންކަމުގައި ވަކާލާތު ކުރަން ތިބޭ ބަޔަކަށްވާއިރު މެމްބަރުންގެ އަތުން އެ ބާރުތައް މީހަރު ގެއްލިގެން ގޮސްފައިވާކަމަށެވެ.
ގާނޫނު އަސާސީގެ ދިފާއުގެ ނަމުގައި އިދިކޮޅު އެމްޑީޕީން ބޮޑު އެއްވުމެއް ބާއްވަން އަންނަނީ ތައްޔާރުވަމުންނެވެ. މާދަމާރޭ އޮންނަ މި އެއްވުން އޮތީ ކާނިވާ ސަރަހައްދުގައެވެ.
