ކުރިއަށް އޮތީ ބަނަ ދުވަސްތަކެއް ކަމަށް ރައީސް އިބްރާހީމް މުހައްމަދު ސާލިހު ވިދާޅުވީ، އެމްޑީޕިން އިސްނަގައިގެން، ގާނޫނު އަސާސީގެ ދިފާއުގައި ނަމުގައި ކުރިއަށް ގެންދާ އެއްވުމުގައި ވާހަކަ ދައްކަވަމުންނެވެ.
ރައީސް ސާލިހް ވިދާޅުވީ ބަލައިލި ކޮންމެ ދިމާލަކުންވެސް ރައްޔިތުންނަށް ފެންނަނީ، އިތުބާރު ގެއްލިއްޖެކަމުގެ މަންޒަރުތައް ކަމަށެވެ. މި މޭރުމުން ވާހަކަ ދައްކަވަމުން ރައީސް އިބްރާހީމް މުހައްމަދު ސާލިހް ވިދާޅުވީ، ގެއްލިފައިވާ ހައްގުތައް ހޯދަން ރައްޔިތުން ނުކުންނަން ޖެހޭ ކަމަށެވެ.
އިބްރާހިމް މުހައްމަދު ސާލިހު އިތުރަށް ވިދާޅުވީ، އެމްޑީޕީން މަގުމައްޗަށް ނުކުތީ އަހަރެއްވަންދެން ބެލުމަށް ފަހު ކަމަށެވެ. އިބްރާހިމް މުހައްމަދު ސާލިހު ވިދާޅުވީ މި ސަރުކާރުގެ އަމާޒަކީ ހުދުމުހުތާރު ވެރިކަމެއް އަލުން ގެނައުން ކަމަށެވެ.
އެމްޑީޕިން މާލޭގައި ބޭއްވި އެއްވުން ފެށުމުގެ ކުރިން އޮތް އެމްޑީޕީގެ ގައުމީ މަޖިލީހުގެ ޖަލްސާގައިވަނީ، ރައްޔިތުންގެ މަޖިލީހުގެ މެންބަރެއް ޕާޓީން ވަކިކޮށްގެން ގޮނޑި ގެއްލޭ ގޮތަށް ގާނޫނު އަސާސީއަށް ގެނައި ބަދަލު ދެމި އޮންނަ މުއްދަތުގައި، ރައްޔިތުންގެ ހައްގުގައި ވަކާލާތުކޮށްގެން ނުވަތަ އެމްޑީޕީއަށް ސޮއިކުރުމުގެ ސަބަބުން ގޮނޑި ގެއްލިއްޖެ ނަމަ އެ މެންބަރަކު ތަމްސީލުކުރި ދާއިރާއަށް އަލުން އިންތިހާބު ކުރަން އެހީތެރިވުމަށް އިގުރާރުވެފައެވެ.
އަދި މީގެ އިތުރުން، ގާނޫނުއަސާސީއަށް ގެނައި ބަދަލު ބާތިލު ކުރަން އެމްޑީޕީގެ ގައުމީ މަޖިލީހުންވަނީ ޕެޓިޝަނެއް ފާސްކޮށްފަ އެވެ. އަދި އިދިކޮޅު ސިޔާސީ ހަރަކާތްތައް މުޅި ރާއްޖެއަށް ފުޅާކޮށް އެކި ކަންކޮޅުތަކުގައި އިހުތިޖާޖުތައް ރާވައި ހިންގުމަށް އިދިކޮޅު މައި ޕާޓީ އެމްޑީޕީންވަނީ ނިންމައިފި އެވެ.
