މިދިޔަ ބުރާަސްފަތި ދުވަހު މާލޭގައި ހުރި، ތިން މިނިސްޓްރީއެއް ހިނގަމުން ދިޔަ އިމާރާތް އަދާނގެން ދިޔަ އަލިފާނުގެ ހާދިސާގައި، އެ ގޯތިރޭގައި ހުރި، މާލެ ސިޓީގެ ވައިޓަލް ރަޖިސްޓްރޭޝަންގެ ހިދުމަތް ދެމުންދިޔަ އިމާރާތަށް ވެސް ބޮޑެތި ގެއްލުންތަކެއް ލިބިފައިވާކަން މާލޭ ސިޓީ ކައުންސިލުން ފާހަގަކުރެއެވެ.
އެހެން ކަމަށް ވުމާއެކު މި ވަގުތު، ވައިޓަލް ރަޖިސްޓްރޭޝަންގެ ހިދުމަތް ދެމުން ގެންދަނީ ހުޅުމާލޭ އަމީން އެވެނިއުގެ ފުރަތަމަ ފަންގިފިލާގައި ހުންނަ މާލެސިޓީގެ އޮފީހުން ކަމަށް އެ އިދާރާއިން ބުނެއެވެ.
އޭގެއިތުރުން މި ހަފުތާތޭރޭ، ވައިޓަލް ރަޖިސްޓްރޭޝަންގެ ހިދުމަތް، މާލެއިން ދޭން ފެށުމުގެ މަސައްކަތް ކުރަމުން ދާކަަމަށާއި މި ކަމާގުޅިގެން ރައްޔިތުންނަށް ކުރިމަތި ވަމުންދާ ދަތިތަކަށް ޓަކައި، އެ ކައުންސިލުން ވަނީ ނިހާޔަށް މައާފަށް އެދިފައެވެ.
ހައުސިން މިނިސްޓްރީ އާއި ކޮންސްޓްރަކްޝަން މިނިސްޓްރީ ހިންގަމުން އައި ގްރީން ބިލްޑިން ބުރާސްފަތި ދުވަހު އަލިފާނުގެ ހާދިސާގައި އެއްކޮށް އަނދާ ހުލިވެފައިވާއިރު އެ މިނިސްޓްރީއާ އިންވެގެން ހުރީ އެންވަޔަރަމަންޓް މިނިސްޓްރީއަށް ވެސް ވަނީ ބޮޑެތި ގެއްލުންތަކެއް ވެފައެވެ.
ވަގުތީ މެދުކެނޑުމަކަށްފަހު 3 މިނިސްޓްރީގެ މަސައްކަތް ދަރުބާރުގެއަށް ބަދަލުކޮށް މިއަދު ވަނީ މަސައްކަތްތައް އަލުން ފަށާފައެވެ.
