ފުލުހުން ބުނީ މެސެޖުގައި ވާރު ޕޭގެ ޕޭމެންޓް ލިންކެއް ހިމެނޭނެ ކަމަށާއި ޖޫރިމަނާގެ ފައިސާ ދައްކަން ޖެހޭނީ އެ ލިންކް މެދުވެރިކޮށް ކަމަށެވެ. އަދި ވޭޕް ވިއްކުމާއި ހިލޭ ދިނުމާއި ބެހުމާއި އެކަކު އަނެކަކަށް ދޭ ފަރާތްތަކާ ދެކޮޅަށް ވެސް ގާނޫނީ ފިޔަވަޅު އަޅާނެ ކަމަށް ފުލުހުން ބުނެފައިވެ އެވެ.
އާދިއްތަ ދުވަހުން ފެށިގެން އަމަލުކުރަން ފެށި ގާނޫނުގެ ދަށުން ވޭޕް ރާއްޖެ އެތެރެކުރާ ފަރާތްތައް 50،000 ރުފިޔާއިން ޖޫރިމަނާ ކުރެވޭނެ އެވެ. އަދި އެތެރެކުރާ ކޮންމެ ވޭޕަކަށް 10،000 ރުފިޔާގެ މަގުން އިތުރު ޖޫރިމަނާއެއް ކުރެވޭނެ އެވެ.
ވޭޕް ވިއްކާ ފަރާތްތައް 20،000 ރުފިޔާއިން ޖޫރިމަނާ ކުރެވޭނެ އެވެ. އަދި ކުޑަކުދިންނަށް ވިއްކާ ފަރާތްތަކުގެ ޖޫރިމަނާ 50،000 ރުފިޔާއަށް އިތުރުވާނެ އެވެ. މީގެ އިތުރުން އަމިއްލަ ގޭގެއާއި ސަރުކާރުގެ އޮފީސްތަކުގައި ވެސް ވޭޕް ބޭނުންކުރުން މަނާ ކަމަށް ފުލުހުން ބުނެފައިވެ އެވެ.
