ދެ ދުވަހެއް ކުރިން ސަސްޕެންޑްކޮށްފައި އޮތުމަށް ފަހު، އަލުން އެ އެކައުންޓް އެކްޓިވްކޮށްފައިވަނީ ރޭގެ ވަގުތެއްގައި ކަމަށްވަނީ މައުލޫމާތު ލިބިފައެވެ. މީގެ ކުރިންވެސް ދެ ފަހަރެއްގެ މަތިން މި އެކައުންޓް ވަނީ ސަސްޕެންޑްކޮށްފައެވެ.
މި އެކައުންޓަކީ ސަރުކާރާއި ސަރުކާރުގެ އިސްމަގާމުތަކުގައި ތިއްބަވާ ފަރާތްތަކަށް ވަރަށް ބޮޑަށް ފާޑު ކިޔަމުން އަންނަ އެކައުންޓެކެވެ. ސަރުކާރުގެ ކޮރަޕްޝަންތައް ކަމަށް ބުނެ ބައެއް ލިޔެކިޔުންތައްވެސް އާއްމުކުރަމުން އަންނަ މި އެކައުންޓުން އަންނަނީ ބައެއް މީހުންގެ ޒާތީ ދިރިއުޅުމާއި ބެހޭ މައުލޫމާތުތައްވެސް އާއްމުކުރަމުންނެވެ. 40،000 އެއްހާ މީހުން މި އެކައުންޓް ފޮލޯ ކުރެއެވެ.
މި ފަހަރު މި އެކައުންޓް ސަސްޕެންޑްކުރި ކީއްވެ ކަމެއް ނޭގެއެވެ.
ގިނަ ބަޔަކު ކުރިން ތުހުމަތުކުރީ މި އެ އެކައުންޓް ބޭނުން ކުރަމުންދަނީ ރައްޔިތުންގެ މަޖުލީހުގެ ކުރީގެ ރައީސް މުހައްމަދު ނަޝީދުކަމަށެވެ. ނަމަވެސް އެތުހަމަތު ނަޝީދު ވަނީ ދޮގު ކުރައްވާފައެވެ. އެކަމާއި ގުޅިގެން އެ މަނިކުފާނުވަނީ މިދިޔަ އަހަރު އެޕްރީލް މަހުގައި އެ އެކައުންޓްގެ ވެރިފަރާތަކީ ކޮބައިތޯ ބެއްލެވުމަށް ފުލުހަށްވެސް މައްސަލަ ހުށައަޅުއްވާފަ އެވެ.
