މަޓާޓޯގެ ސީއީއޯ އާމިނަތު ސޫޒަން ވިދާޅުވި ގޮތުގައި މި މުބާރާތުގައި ބައިވެރިވުމުގެ ފުރުސަތު ހުޅުވާލައިފައި ވަނީ ހަތަރު އުމުރުފުރައަކަށެވެ. އަދި މުބާރާތުގައި ހުށަހެޅޭ މަސައްކަތްތައް ވަޒަންކުރާނީ ރާއްޖެއާއި ރާއްޖެއިން ބޭރުގެ މާހިރުން ހިމެނޭ ޕެނަލަކުންނެވެ.
މުބާރާތުގައި ބައިވެރިވުމަށް އެދި ހުށަހެޅުމުގެ މުއްދަތު ހަމަޖައްސައިފައި ވަނީ 10 ޑިސެމްބަރު 2024 އިން 20 ޖެނުއަރީ 2025 އަށެވެ. ކޮންމެ އުމުރުފުރައަކުން 10 މަސައްކަތެއް ޝޯޓްލިސްޓްކޮށް، 2025 ވަނަ އަހަރުގެ ފެބްރުއަރީ މަހުގައި ނެޝަނަލް އާޓް ގެލެރީގައި ބާއްވާ އެގްޒިބިޝަނެއްގައި އެ މަސައްކަތްތައް ދައްކާލާނެ އެވެ.
މި މުބާރާތަކީ މަޓާޓޯއިން ފުރަތަމަ ފަހަރަށް ބާއްވާ މުބާރާތެއް ކަމަށާއި، މީގެ ފަހުން ކޮންމެ އަހަރަކު ވެސް މި މުބާރާތް ބާއްވާނެ ކަމަށް ސޫޒަން ވިދާޅުވި އެވެ. މި މުބާރާތް އިންތިޒާމުކުރަނީ ޓޫރިޒަމް މިނިސްޓްރީއާއި އެމްއެމްޕީއާރުސީ އަދި ޔޫތު މިނިސްޓްރީއާއި، ދިވެހިބަހާއި ސަގާފަތާއި ތަރިކައާ ބެހޭ މިނިސްޓްރީ، އެންސީއޭ، މަޓީ، އެމްއޭސީ އަދި އެންއެޗްޖީއޭއެމް އާ ގުޅިގެންނެވެ.
