Palestine ah ehee foarukohdhinumaa gulhey garaar ah Raajjein thaaeedhukoffi

ހަބަރު / ފޮރިން މިނިސްޓްރީ

ރައީސް މުއިއްޒާއި ފަލަސްތީނުގެ ރައީސް މަހުމޫދު އައްބާސް ބައްދަލުކުރެއްވުން - ފޮޓޯ: ރައީސް އޮފީސް

ފަލަސްތީނަށް އެހީ ފޯރުކޮށްދިނުމާ ގުޅޭ ގަރާރަށް ރާއްޖެއިން ތާއީދުކޮށްފި

ގުފްތަގް އަޖީރު

22 ޑިސެމްބަރ 2024 - 22:14:07

ފަލަސްތީނުގެ ރައްޔިތުންނަށް އިންސާނީ އެހީ ފޯރުކޮށްދިނުމާ ގުޅޭ ގޮތުން އިންޓަނޭޝަނަލް ކޯޓް އޮފް ޖަސްޓިސް (އައިސީޖޭ) ގެ އިސްތިޝާރީ ލަފައަކަށް އެދި ހުށަހެޅި ގަރާރަށް ދިވެހިރާއްޖެއިން ތާއީދުކޮށްފި އެވެ.

ފޮރިން މިނިސްޓްރީން ބުނީ މި ގަރާރަކީ އދ. އާއި ބައިނަލްއަގުވާމީ ޖަމިއްޔާތަކުން ފަލަސްތީނުގެ ރައްޔިތުންނަށް އެހީތެރިކަން ފޯރުކޮށްދިނުމަށް ކުރަމުންދާ މަސައްކަތްތައް ދެމެހެއްޓުމަށް އެޅޭ މުހިންމު ފިޔަވަޅެއް ކަމަށެވެ.

ނޯވޭގެ އިސްނެގުމާއެކު އެހެން ގައުމުތަކެއް ހިމެނޭ ގްރޫޕަކުން ހުށަހެޅި މި ގަރާރު ވަނީ މި މަހުގެ 19 ވަނަ ދުވަހު ފާސްކޮށްފަ އެވެ. އަދި ރާއްޖެ ހިމެނޭ ގޮތަށް 137 މެންބަރު ގައުމުގެ ވޯޓާ އެކު މި ގަރާރު ފާސްކުރި އިރު، ރާއްޖެއިން ވަނީ މި ގަރާރު ކޯ ސްޕޮންސާ ވެސް ކޮށްފަ އެވެ.

ފޮރިން މިނިސްޓްރީން އިތުރަށް ބުނީ މި ގަރާރަށް ލިބުނު ތާއީދަކީ 1967 ވަނަ އަހަރުގެ ކުރިން އޮތް އިންތަކުގެ މައްޗަށް ބިނާކޮށް ފަލަސްތީނުގެ މިނިވަން އަދި ސިޔާދަތީ ދައުލަތެއް ގާއިމުކުރުމަށް ކުރެވެމުންދާ މަސައްކަތަށް ލިބިގެންދިޔަ ބާރެއް ކަމަށެވެ.