މާލެއިން ހުޅުމާލެއަށް ދަތުރުކުރަނިކޮށް ބުރިޖު ހައިވޭ މަތީގައި މިފަހުން ހިނގި އެކްސިޑެންޓުގައި އަނިޔާވި ފަސް މީހުންނަށް ކުރީގެ ނައިބު ރައީސް ފައިސަލް ނަސީމް އެހީވާ މަންޒަރު ފެންނަ ވީޑިއޯއެއް މީސްމީޑިއާގައި ވަނީ ދައުރުވެފައި އެވެ.
މަންޒަރު ދުށް މީހާ ބުނި ގޮތުގައި ފައިސަލް ވަނީ އެ މީހުން ހުޅުމާލޭ ހޮސްޕިޓަލަށް ފޮނުވާލުމަށް ފަހު، އެ މީހުންގެ ހާލު ބައްލަވާލައްވަން ޓެކްސީއެއްގައި ހުޅުމާލޭ ހޮސްޕިޓަލަށް ވަޑައިގެންފައެވެ.
ސޯޝަލް މީޑިއާގައ އާންމުވި ފޮޓޯ ތަކުން ސައިކަލު ވެއްޓި 2 މީހަކު އަނިޔާވެފައިވާ މަންޒަރު ފެނެ އެވެ. އަދި އެ މީހުންނަށް ފައިސަލް އެހީތެރިވާ މަންޒަރު ވެސް ފެނެ އެވެ.
ނައިބު ރައީސް ފައިސަލް ނަސީމް ހައިވޭގައި ވެއްޓިފައި އޮތް މީހަކަށް އެހީތެރިވަނީ -- ފައިލް ފޮޓޯ
ފާހަގަކޮށްލެވޭ ގޮތުގައި މީގެ ކުރީގައި ވެސް މަގުމަތީގެ އެކްސިޑެންޓުތަކުގައި މި ގޮތަށް އަނިޔާވާ މީހުންނަށް ފައިސަލް އެހީވެވަޑައިގަންނަވާ މަންޒަރުތައް މީސްމީޑިއާގައި އާންމުވެފައިވެ އެވެ.
އެގޮތުން، 2019 ވަނަ އަހަރު މީހަކު މިސްކިތަށް ވެއްޓުނު މީހަކު ވެސް ފައިސަލްގެ ކާރުކޮޅުގައި ހޮސްޕިޓަލަށް ގެންގޮސްދެއްވާފައިވެ އެވެ.
އިޖްތިމާއީ ދާއިރާއިން ގިނަ ހިދުމަތްތަކެއް ކޮށްދެއްވާފައިވާ ނައިބު ރައީސް ފައިސަލަކީ އެކްސިޑެންޓުތައް މަދު ކުރުމާއި ރޯޑް ސޭފްޓީއަށް ވަރަށް ގިނަ މަސައްކަތްތަކެއް ކޮށްދެއްވާފައިވާ ބޭފުޅެކެވެ. އެ މަނިކުފާނު ވަނީ މީގެ ކުރިން އުފަން ރަށް ޏ. ފުވައްމުލަކުގައި އަމިއްލަ ހަރަދުގައި ބަންޕަރުތަކެއް ވެސް ގާއިމްކޮށްފަ އެވެ. އަދި، އެ މަނިކުފާނުގެ ޚަރަދުގައި ރޯޑް ސޭފްޓީގެ އެތައް ޕްރޮގްރާމެއް ވެސް ހިންގާފައިވެ އެވެ.
