ނަޝީދު މިހެން ވިދާޅުވީ އިއްޔެ ވެހުން ބޯ ވާރޭގެ ސަބަބުން މާލޭ ތެރެ ވަރަށް ބޮޑަށް ފެންބޮޑުވުމާ ގުޅިގެން އެކަމާމެދު ކަންބޮޑު ފާޅުކުރައްވަމުންނެވެ.
ނަޝީދު ވިދާޅުވީ ދުނިޔެ ހޫނުކުރާ ވަރަކަށް ކުރިއަށް އޮތްތަނުގައިވެސް މިފަދަ މަންޒަރުތައް ފެންނަލެއް ގިނަވާނެކަމަށެވެ. އަދި މިފަދަ ގުދުރަތީ ހާދިސާތައް ދިމާވާ ކޮންމެފަހަރަކު ލޮސް އެންޑް ޑެމޭޖް ފަންޑެއް ލިބޭނެކަމަށް އުއްމީކުރާކަަށްވެސް ނުވާނެކަމަށް ނަޝީދު ވިދާޅުވި އެވެ.
މިހުރިހާކަމަކީވެސް މޫސުމަށް އަންނަ ބަދަލުތަކުގެ އަނިޔާވެރިކަން ކަމަށް ނަޝީދު ފާހަގަކުރެއްވި އެވެ.
އިއްޔެ ވެހުނު ބޯ ވާރޭގައި މާލެ އާއި އިތުރު 8 ރަށަކަށް ވަނީ ބޮޑެތި ގެއްލުންތަކެއް ވެފަ އެވެ.
މިހާރު ރާއްޖެއަށް ކުރަމުންދާ ވިއްސާރައަކީ މި ސަރަހައްދުގައި އުފެދިފައިވާ ކޮޅިގަނޑެއްގެ ސަބަބުން ކުރަމުންދާ ވިއްސާރައްކަމަށާއި ވިއްސާރަ އަލިވާނެކަމަށް ބެލެވެނީ ހޯމަ ދުވަހުގެ ފަހުން ކަމަށް މެޓު އޮފީހުން ބުނެ އެވެ.
