ބްރެޒިލްގެ ޖޯޒީ ސިފަވާ ގޮތަށް ޖޯޒީ ފަރުމާކޮށްގެން ކުޅުނު އޭދަފުށްޓަކީ ގޯލްޑަން ފުޓްސަލް ޗެލެންޖުގެ އެންމެ ފަހުގެ ޗެމްޕިއަނުންނެވެ.
އެ ޓީމުން ރޭ، ލ. ގަމު އަތްދަށުވެ ބަލިވީ އެއް ލަނޑު ސުން ލަނޑުންނެވެ. ގަމަކީ މިދިޔަ އަހަރުގެ ޗެރިޓީ ޝީލްޑްގެވެސް ޗެމްޕިއަނުނުންނެވެ. ރޭ ގަމުން އޭދަފުށި މައްޗަށް ކުރި ހޯދީ ގަމުގެ އެންމެ މުހިއްމު ކުޅުންތެރިންގެ ތެރޭގައި ހިމެނޭ ކެޕްޓަން، ހުސެއިން ޝަރީފް (އޮންލީ) އާއި އަލީ ޝާމިސް (ތޮއްޕޭ) ނުލައެވެ. މައުލޫމާތު ލިބިފައިވާ ގޮތުގައި ދެ ކުޅުންތެރިންވެސް ތިބީ އަނިޔާގައެވެ. އޭދަފުށި ކޮޅަށް، ގަމުން ޖެހި ހަމައެކަނި ލަނޑު ޖެހީ އަބްދުﷲ ޖުނައިދު (ޖެންނޭ) އެވެ.
ރޭގެ ޗެރިޓީ ޝީލްޑް މެޗުން، މޮޅުވި ގަމަށް ލިބުނު 25،000 ރުފިޔާ ވަނީ ފަލަސްތީނުގެ ގާޒާ ރައްޔިތުންނަށް ހަދިޔާކޮށްފަ އެވެ.
ރާއްޖޭގެ އެންމެ ބޮޑު، އަދި އެންމެ ފޯރިގަދަ ފުޓްސަލް މުބާރާތުގެ މި އަހަރުގެ ސީރީޒް ރޭ ފެށިއިރު، މި އަހަރުގެ މުބާރާތުގައި 129 ޓީމެއް ވާދަކުރެ އެވެ. މުބާރާތުގައި މިރޭ ކުޅޭނީ ބޮޑު ތިލަދުންމަތީގެ ޓީމުތަކުގެ މެޗުތަކެވެ.
