ނޭޝަނަލް ޑިޒާސްޓާ މެނޭޖްމަންޓް އޮތޯރިޓީން އެކުލަވާލި މި އިސްތިރާޖުގައި މައިގަނޑު 7 ލަނޑުދަނޑި ހިމެނެއެވެ. އޭގެ ތެރޭގައި ކާރިސާގެ ކަންކަން ބެލެހެއްޓުމާ ގުޅޭ ގާނޫނީ އިޖުރާއަތްތައް ހަރުދަނާކުރުމާއި، ދުރާލާ އިންޒާރު ދޭ ނިޒާމްތައް ހަރުދަނާކުރުން ހިމެނެއެވެ. މީގެ އިތުރުން ކާރިސާތަކަށް މުޖުތަމައު ވިލުންތެރިކުރުމާއި، އެފަދަ ހާލަތްތަކުގައި އިޖާބަދިނުމުގެ ގާބިލުކަން އިތުރުކުރުންވެސް ހިމެނެއެވެ.
އެންޑީއެމްއޭގެ ޗީފް އެގްޒެކެޓިވް އޮފިސަރ ހިސާން ހަސަން ދައުލަތުގެ މީޑިއާ މެދުވެރިކުރައްވައި ވާހަލ މި އިސްތިރާޖަކީ ކުރިމަގުގައި ދިމާވެދާނެ ކާރިސާތަކަށް ތައްޔާރުވުމަށް އެހީތެރިވެދޭނެ މަގުޗާޓެއް ކަމަށެވެ. އަދި ބައިނަލްއަގުވާމީ މުއާހަދާތަކުގައި ރާއްޖެ ބައިވެރިވެ، ކާރިސީ ހިރާސް ކުޑަކުރުމަށް ގިނަ މަސައްކަތްތަކެއް ކުރަމުންދާ ކަމަށް އޭނާ ބުނިއެވެ.
މި އިސްތިރާޖުގެ މައިގަނޑު މަގުސަދަކީ މޫސުމީ ގޮތުންނާއި އެހެނިހެން ގޮތްގޮތުން ކުރިމަތިވެދާނެ ކާރިސާތަކުގެ ސަބަބުން ރާއްޖޭގެ ތިމާވެށްޓާއި ބިނާވެށި ރައްކާތެރިކުރުމެވެ. އަދި ރައްޔިތުންގެ ގެދޮރާއި މުދާ ހިމާޔަތްކުރުމާއި، ކާރިސާތަކަށް ކުރިއާލާ ތައްޔާރުވުމާއި، ކާރިސާތަކަށް ވިލުންތެރި މުޖުތަމައުއެއް ބިނާކުރުމެވެ.
