އާސަންދައިން ބުނީ، ބޭސް ގަންނަން ދިއުމުން އަމިއްލަ އަތުން ފައިސާ ދައްކަން ޖެހޭނަމަ ނުވަތަ ބޭހެއް އާސަންދައިން ލިބެން ނެތް ނަމަ ވައިބާ މެދުވެރިކޮށް ޝަކުވާ ހުށަހެޅޭނެ ކަމަށެވެ.
ޝަކުވާ ހުށަހަޅަން ޖެހޭނީ 7591400 އަށެވެ. ޝަކުވާ ހުށަހަޅާއިރު ބޭހުގެ ނަމާއި ބޭސް ސިޓީ އަދި ރަސީދު ވެސް ފޮނުވަން އާސަންދައިން ވަނީ އެދިފަ އެވެ.
އާސަންދައިން ބޭހަށް ދޫކުރާ އަގު ކުޑަކުރުމާ އެކު ބައެއް ބޭސްތައް ދޫކުރުން ހުއްޓުނެވެ. އަދި، ބައެއް ބޭސްތައް އާސަންދައިގެ ތެރެއިން ނުލިބޭކަމުގެ ކަންބޮޑުވުން ބޮޑުވި އެވެ.
އާސަންދައިގެ ދަށުން ދޫކުރާ 250 ބޭހެއްގެ އަގަށް ބަދަލު ގެންނަން ސަރުކާރުން ނިންމީ އާސަންދައަށް ސަރުކާރުން ކުރާ ހަރަދު ކުޑަކޮށް އެ ނިޒާމު ހަރުދަނާ ކުރަން ކުރާ ރީފޯމު މަސައްކަތުގެ ތެރެއިންނެވެ.
އާސަންދައަށް މަޖިލީހުން ފާސްކުރާ ބަޖެޓަށް ވުރެ ބޮޑު ހޭދައެއް ކޮންމެ އަހަރަކު އާސަންދައަށް ކުރަންޖެހި އެ ނިޒާމުވަނީ ދައުލަތަށް ބޮޑު ބުރައަކަށް ވެފަ އެވެ.
