މި ދެ ތަރިން ޗުއްޓީ ހޭދަކުރަމުން އަންނަނީ ޅ. އަތޮޅުގައި އޮންނަ ރިސޯޓެއް ކަމަށްވާ ފުޝިފަރު މޯލްޑިވްސްގަ އެވެ.
އިއްޔެގެ ވަގުތެއްގައި ބިޕާޝާ ރާއްޖެ އައިސްފައިވާއިރު މި ފަހަރުގެ ދަތުރުގައި ވެސް ފިރިމީހާ/އެކްޓަރު ކަރަން ސިންގް ގްރޯވާ އަދި ދަރިފުޅު ދޭވީ ބައިވެރިވެ އެވެ.
ދަރިފުޅު ދޭވީ އެ ރިސޯޓުގެ ހިތްގައިމު ގޮނޑުދޮށުގައި ކުޅޭ މަންޒަރު ފެންނަ ފޮޓޯތައް ހިމެނޭހެން މިފަހަރުގެ ދަތުރުގެ ފޮޓޯތަކާއި ވީޑިއޯތަކެއް ބިޕާޝާގެ އަމިއްލަ އިންސްޓަގްރާމްގެ ސްޓޯރީގައި ވަނީ ހިއްސާކޮށްފަ އެވެ.
އިންޑިއާގެ ސެލެބްރިޓީންގެ ތެރެއިން ބިޕާޝާއާއި ކަރަން ފާހަގަކުރެވިފައިވަނީ ޗުއްޓީ ދަތުރުގައި ރާއްޖެއަށް ވަރަށް ގިނައިން ޒިޔާރަތްކުރާ ތަރިންގެ ގޮތުގަ އެވެ.
މި މަހުގެ ހަތްވަނަ ދުވަހު ބިޕާޝާގެ އުމުރުން 45 އަހަރު ފުރޭނެ އެވެ.
ކަރަން އާއި ބިޕާޝާ ބައްދަލުވެފައިވަނީ އެ ދެ މީހުން އެކުގައި ކުޅުނު "އެލޯން"ގެ ޝޫޓިންގަ އެވެ. ފުރަތަމަ ދުވަހުން ފެށިގެން ބިޕާޝާ އާއި ކަރަންގެ ގުޅުން ބަދަހިވެ މާ ގިނަ ދުވަހެއް ނުވެ ލޯބީގެ ގުޅުމަކަށް ބަދަލުވި އެވެ. އަދި ކައިވެންޏަށްފަހު، ފާއިތުވީ ދުވަސް ތަކުގައި މި ދެ ތަރިންގެ ގުޅުން ވަނީ ވަރަށް ވަރުގަދަ ވެފަ އެވެ.
