މި ޖެނުއަރީ މަހުގެ 3 ވަނަ ދުވަހުގެ 00:00 އިން 4 ވަނަ ދުވަހުގެ 00:00 އަށް 161.9 މިލިމީޓަރުގެ ވާރޭ ވަނި ވެހިފައެވެ. މެޓް އޮފީހުން ވަނީ މިއީ 24 ގަޑީރު ތެރޭ މާލޭއަށް އެހާ ބޯކޮށް ވާރޭ ވެހުމުގެ ރެކޯޑެއް ކަަމަށް ފާހަަގަކޮށްފަ އެވެ.
ވިއްސާރާގައި މާލޭގެ ގެ ތަކަށް ލިބުނު ގެއްލުން 2.2 މިލިއަން ރުފިޔާއަށް އަރާއިރު މިއީ ހަަމއެކަނި މީހުން ދިރިއުޅޭ ގެތަކަށް ލިބުނު ގެއްލުން ކަމުގައި އެންޑީއެމްއޭއިން ބުނެ އެވެ. މީގެ ތެރޭގައި އެކި އެކި ވިޔަފާރީތަކާއި ގުދަން ފަދަ ތަންތަން ނުހިމެނޭ ކަމަށް އެންޑީއެމްއޭއިން ބުނެ އެވެ.
އެންޑީއެމްއޭއިން މައުލޫމާތު ދޭގޮތުގައި އަތޮޅުތެރޭ ރަށަރަށުގެ މީހުން ދިރިއުޅޭ ގެތަކަށް ލިބުނު ގެއްލުން 8 ލައްކައަށް އަރާކަަމަށާއި އޭގެ ތެރޭގައި ދަނޑުބިންތަކާއި ވިޔަފާރީތައް ނުހިމެނޭނެކަމަށް އެ އޮތޯރިޓީން ބުނެ އެވެ.
ފެންބޮޑުވުމުގެ އޮޕަރޭޝަނަށް 61،000 ރުފިޔާ ހަރުވިކަަމަށާއި ރިލީފްގެ ގޮތުގައި ހާލުގައި ޖެހުނު ފަރާތްތަަކަށް ވަގުތީ ބޯހިޔާވަހިކަމާއި ކެއުން ބުއިމަށް ދެލައްކަ ރުފިޔާގެ އެހީތެރިކަން ފޯރުކޮށްދެވުނު ކަމަށް އެންޑީއެމްއޭއިން ބުނެ އެވެ.
ފެންބޮޑުވުމާ ގުޅިގެން ހިފާ ގެންގުޅޭ ތަކެއްޗާ އިމާރާތަށް އެކިވަރުގެ ގެއްލުން ލިބިގެން، ޑެމޭޖް އެސެސްމަންޓް ހަދަން ޖެހޭ ކަަމަށް މާލެއިން 145 ގޭބިސީއެއް ފާހަގކުރެވުނު ކަމަށްވެސް އެންޑިއެމްއޭއިން ބުނެއެވެ. އޭގެތެރެއިން 115 ގެއެއްގެ އެސެސްމަންޓް އެއްކޮށް ނިމި، 13 ގެއަކުން އެސެސްމަންޓް ހަދަން ބޭނުންނުވާކަމަށް އަންގާފައިވާކަން އެންޑީއެމްއޭއިން ފާހަގަކުރެ އެވެ. އަދި ވެރިފަރާތަށް ނުގުޅިގެންނާއި ގެއަށް ނުވަދެވިގެން އަދިވެސް އިތުރު ސަބަބުތަކާހުރެ އެސެސްމަންޓްހަދަން ޖެހޭ ތަަނަށް ނުވަދެވުމުގެ ސަބަބުން އެސެސްމަންޓް ނުހެދޭ 17 ތަނެއް ހުރިކަަމަށް އެ އޮތޯރިޓީން ބުނެ އެވެ.
