އެނގިފައިވާ ގޮތުގައި، އަލްހިޖުރަ ކުންފުނީގެ ހަވާލުގައި އުމްރާ އަށް މީހުން ފުރިއިރު ވެސް ޓިކެޓާއި ވިސާގެ މައްސަލަ ޖެހުނެވެ. އެ މީހުން ފުރުވާލަން ވެސް ޖެހުނީ އެކި ފްލެޓްތަކުން އެކި ދުވަސްތަކުގަ އެވެ. މިހާރު ސައުދީގައި ތާށިވެފައި ތިބި އުމްރާވެރިން އަނބުރާ ރާއްޖެއަށް ގެނައުމަށް ބޭނުންވާ ޓިކެޓު ގަތުމަށް އެ ގުރޫޕުން އަންނަނީ މަސައްކަތްކުރަމުންނެވެ.
އެ މައްސަލަ ފެންމަތިވުމުން ކުންފުނިން ބުނީ އުމްރާގެ އަޅުކަން އަދާކޮށް ނިމުނު ފަހުން އެމީހުން އަނބުރާ ރާއްޖެ ނުގެނެވި ވަނީ ކުންފުންޏަށް ދިމާވި މާލީ ދަތިތަކެއްގެ ސަބަބުން ކަމަށެވެ.
ހާލުގައި ޖެހިފައި ތިބީ 23 އުމްރާވެރިންނެވެ. އޭގެ ތެރޭގައި 12 އަހަރުން ދަށުގެ ތިން ކުޑަކުދިން ތިއްބެވެ.
އިސްލާމިކް މިނިސްޓްރީން ބުނީ، އެ ކުންފުނީގެ "2024 ޑިސެމްބަރު އުމްރާ ދަތުރު"ގައި ދިއުމަށް ހަމަޖެހިފައިވާ އުމްރާވެރިން ދަތުރަށް ފައިސާ ދައްކާފައިވީ ނަމަވެސް އެ ފައިސާއިން އުމްރާވެރިންގެ ދެކޮޅު ޓިކެޓު ހަމަނުޖައްސާ އެ ފައިސާ ކުންފުނީގެ އެހެން ކަންކަމަށް ބޭނުންކޮށްފައިވާކަމަށް އެ ކުންފުނިން އިއުތިރާފުވެފައިވާ ކަމަށެވެ.
އަދި އެ ގްރޫޕްން ރާއްޖެއިން އުމްރާއަށް މީހުން ގެންދިޔުމާބެހޭ އުސޫލާއި ހިލާފުވެފައިވާތީ ފިޔަވަޅުތަކެއް އެޅުމަށް ނިންމާފައި ވެއެވެ. އެގޮތުން:
1- ރާއްޖެއިން އުމްރާއަށް މީހުން ގެންދިއުމަށް އެ ވުޒާރާއިން، އެ ގްރޫޕަށް ދޫކޮށްފައިވާ ހުއްދަ ހިފެހެއްޓުން
2- އެއްލައްކަ ރުފިޔާއިން އެ ގްރޫޕް ޖޫރިމަނާކުރުން
3- އެ ގްރޫޕް އަދި އެ ކުންފުނީގެ އެއްވެސް ހިއްސާދާރެއް ހިމެނޭ އެހެން ކުންފުންޏަކަށް ވެސް އުމްރާއަށް މީހުން ގެންދިޔުމުގެ ހުއްދަނުދިނުން
4- އެ ގްރޫޕްގެ ފަރާތުން އުމްރާއަށް ގެންގޮސް ހާލުގައި ޖެހުނު މީހުން ރާއްޖެ ގެނައުމަށް އެ ވުޒާރާއިން ކުރި ހަރަދު އެ ކުންފިން ހޯދުން
5- މި މައްސަލަ ތަހުގީގުކޮށް ގާނޫނީ ފިޔަވަޅު އެޅުމަށް ފުލުހަށް ހުށަހެޅުން.
އަލް-ހިޖުރަ ޓްރެވެލްސް އެންޑް ޓުއާސް އިން އުމްރާއަށް ގެންގޮސް އަނބުރާ ރާއްޖެ ނާދެވި، ހާލުގައި ޖެހުނު މީހުން ހައްޖު ކޯޕަރޭޝަންގެ ހަވާލުގައި ރާއްޖެ ގެނައުމުގެ މަސައްކަތް އިސްލާމިކް މިނިސްޓްރީން މިހާރު އަންނަނީ ކުރަމުންނެވެ.
