ރައީސް އޮފީހުން ހާމަކޮށްފައިވާ ގޮތުގައި މި ދަތުރު އެމަނިކުފާނު ކުރައްވާނީ ޖެނުއަރީ 13-16 އަށެވެ. މިއީ ރާއްޖޭގެ ރައީސަކު އެސްޓޯނިއާއަށް ވަޑައިގަންނަވާނެ ފުރަތަމަ ފަހަރެވެ.
މި ދަތުރުގައި އެ ގައުމުގެ ރައީސާއި ކެބިނެޓުގެ ބައެއް ވަޒީރުންނާ ވެސް ރައީސް މުއިއްޒު ބައްދަލުކުރައްވާނެ އެވެ. މި ދަތުރުގައި ރައީސް މުއިއްޒުގެ އަރިހުގައި ސަރުކާރުގެ މަތީ ފަންތީގެ ވަފުދެއް ވެސް ބައިވެރިވާނެ އެވެ.
ރައީސް މުއިއްޒުގެ މިދަތުރުފުޅުގައި ދެ ގައުމުން އެކި ދާއިރާތަކުން ގުޅުން ބަދަހިކުރުމަށާއި ގުޅިގެން ކުރިއަށް ދެވިދާނެ ފުރުސަތުތައް ބައްލަވާނެ ކަމުގައި ރައީސް އޮފީހުން މައުލޫމާތު ދީފައިވެ އެވެ.
އެގޮތުން ޑިޖިޓަލް، ސައިބަ އަދި އީ-ގަވާނަންސްގެ ދާއިރާއާއި މޫސުމާއި ތިމާވެށީގެ މައްސަލަތަކާއި ސައިންސާއި ތައުލީމީ ދާއިރާ އިން ގުޅިގެން ކުރިއަށް ދެވޭނޭ ދާއިރާތައް ދެނެގަންނާނެ ކަމަށްވެސް ބުންޏެވެ.
