މިނިސްޓަރު މުއްތަލިބް އެކްސްގައި ކުރެއްވި ޕޯސްޓެއްގައި ވިދާޅުވީ މާފަންނު ސަހަރާ ހުސްކުރުމުގެ މަސައްކަތް ބަޔަކާއި ހަވާލުކޮށްގެން މާލޭ ސިޓީ ކައުންސިލުން ކުރަމުން އަންނައިރު އެ ސަރަހައްދުގައި ހުރި ސްޓޯމްވޯޓާ ޕަމްޕް ސްޓޭޝަނަށް ގެއްލުންތަކެއް ލިބިފައިވާ ކަމަށެވެ.
މުއްތަލިބް ވިދާޅުވީ މި ފަމްޕު ސްޓޭޝަންތައް ގަވައިދުން މިނިސްޓްރީން އިންސްޕެކްޓް ކުރާއިރު، އެ ޕަމްޕް ސްޓޭޝަން މިދިޔަ ހަފުތާގައި ވެސް މަސައްކަތް ކުރިކަމަށެވެ. މިނިސްޓަރު ވިދާޅުވީ މާފަންނު ސަހަރާގައި ހުރި މިނިކަށިތައް ނެގުމުގެ މަސައްކަތް ކުރަމުން އަންނައިއިރު ޕަމްޕު ސެޓޭޝަންތައް ހުރި ސަރަހައްދު ކޮންނަންޖެހޭ ސަބަބެއް ނެތްކަމަށެވެ.
މިނިސްޓަރު ވިދާޅުވީ ސިޓީ ކައުންސިލުން މި މަސައްކަތް ކޮށްފައިވަނީ ކޮންސްޓްރަކްޝަން މިނިސްޓްރީގެ ހުއްދަ ނުހޯދާކަމަށެވެ. އަދި މި މަސައްކަތް ކުރި މީހުން ވަނީ މާލޭގެ ހުޅަނގު އުތުރު ފަރާތަށް ހިދުމަތްދޭ ސްޓޯމްވޯޓާ ޕަމްޕް ސްޓޭޝަން ތަޅާލާފައިކަމަށްވެސް މިނިސްޓަރު މުއްތަލިބް ވިދާޅުވިއެވެ. މިނިސްޓަރު މުއްތަލިބް ވިދާޅުވީ މީ ގަސްދުގައި ކޮށްފައިވާކަމެއް ކަމަށް ބެލެވޭކަމަށެވެ.
މުއްތަލިބްގެ މި ވާހަކަތަކަށް ރައްދުދެއްވާ މާލޭ ސިޓީގެ މޭޔަރު އާދަމް އާޒިމް އެކްސްގައި ކުރެއްވި ޕޯސްޓެއްގައި ވިދާޅުވީ މާފަންނު ސަހަރާގައި ހުރި ސްޓޯމް ވޯޓާ ޕަމްޕް ސްޓޭޝަންތައް ހަލާކުވެފައި ހުންނަތާ ފަސް މަސް ދުވަސް ވެދާނެ ކަމަށާއި އެކަން މިނިސްޓަރު ޑރ. އަބްދުﷲ މުއްތަލިބުގެ ސަމާލުކަމަށް ގެންނެވިކަމަށެވެ.
