ދުބާއި ޕޮލިސް އާއި ރޮޗެސްޓާ އިންސްޓިޓިއުޓް އޮފް ޓެކްނޮލޮޖީ - ދުބާއި އިން އިންތިޒާމުކޮށްގެން ބާއްވާ "ޕްރޮފެޝަނަލް ޑިޕްލޮމާ އިން ޕޮލިސިން އިނޮވޭޝަން އެންޑް ލީޑާޝިޕް" ކޯހުގައި ބައިވެރިވުމުގެ ފުރުސަތު ދިވެހި ފުލުހުންގެ ހިދުމަތުގެ މުވައްޒަފަކަށް ލިބުނު މިއީ ފުރަތަމަ ފަހަރުކަމަށްވާއިރު ކޯސް ހިނގާނީ 4 މަސްދުވަހުގެ މުއްދަތަކަށް ކަން މޯލްޑިވްސް ޕޮލިސް ސާވިސް އިން ބުނެ އެވެ.
މި ކޯހުގައި ބައިވެރިވުމަށް އެކުވެރި އަރަބި އިމާރާތުގެ ދުބާއިއަށް ފުރާފައިވަނީ ކޮންސްޓަބަލް އާމިނަތު މުޝްރިފާ އެވެ. އަދި މި ކޯސް މާދަމާ ފެށޭއިރު، ނިމޭނީ އަންނަ މެއި މަހުގެ 10 ވަނަ ދުވަހުގައިކަމަށް ފުލުހުންގެ ހިދުމަތުން މައުލޫމާތުދެ އެވެ.
މިއީ ފުލުހުންނަށް އަމާޒުކޮށްގެން ހިންގާ ރެސިޑެންޝަލް ތަމްރީނު ޕްރޮގްރާމެކެވެ. އަދި މި ޕްރޮގްރާމުގައި ބައިވެރިވާ ފަރާތްތަކަށް ޒަމާނީ އުކުޅުތަކާއި، ލީޑަރޝިޕް ހުނަރުތައް އަދި ގާނޫނު ތަންފީޒުކުރުމުގެ ދާއިރާގައި ކުރިއެރުން ގެނެސްދޭނެ އާ ވިސްނުންތަކާ ބެހޭ މައުލޫމާތު ލިބިގެންދާނެއެވެ. މި ކޯހުގައި 8 އެކަޑަމިކް މޮޑިއުލްއާއި 5 ޓެކްޓިކަލް މޮޑިއުލް ހިމެނޭ ކަމަށް ފުލުހުންގެ ހިދުމަތުން ބުނެ އެވެ.
ކޯހުގެ އެކަޑަމިކް މޮޑިއުލްތަކުގެ ތެރޭގައި އެކުވެރި އަރަބި އިމާރާތުގެ މުޖުތަމައާއި ގާނޫނު ތަންފީޒުކުރުން، އަލަށް ތައާރަފުވަމުންދާ ޓެކްނޮލޮޖީތައް، ފުލުހުންގެ ލީޑަރޝިޕް އަދި އިނޮވޭޝަން، ސްމާޓް ސިޓީތަކުގައި ފުލުހުންގެ ހިދުމަތް ދިނުން، އަދި ޑިޖިޓަލް ޓްރާންސްފޮމޭޝަން ފަދަ މުހިންމު މޮޑިއުލްތައް ހިމެނެއެވެ. އަދި ޓެކްޓިކަލް މޮޑިއުލްތަކުގެ ތެރޭގައި ހަތިޔާރު ބޭނުންކުރުމާއި، ހާދިސާތައް މެނޭޖްކުރުމާއި، ކްރައިސިސް ނެގޯޝިއޭޝަން ފަދަ އަމަލީ ތަމްރީނުތައް ހިމެނެ އެވެ.
