އެޕާޓީން މިހެން ބުނެފައި މިވަނީ ރައްޔިތުން މަޖިލީހުގެ އެމްޑީޕީއަށް ނިސްބަތްވާ ވައިކަރަދޫ ދާއިރާގެ މަޖިލިސް މެމްބަރު ހުސައިން ޒިޔާދު (ފިއްޓޭ) އޭނާއަށް ނޭނގި ވެރިކަން ކުރާ ޕީއެންސީއަށް ވެއްދި މައްސަލައިގައި، އެ ކަމުގައި ޒިންމާވާ ފަރާތްތަކާމެދު ފިޔަވަޅު އަޅާނެކަމަށް އިލެކްޝަންސް ކޮމިޝަންސް (އީސީ) އިން އިއްޔެ ބުނެފައި ވަނިކޮށެވެ. އަދި މި ނޫންވެސް ބައެއް މީހުންނަށް ނޭނގި އޮޅުވާލައިގެން ޕީއެންސީއަށް ވައްދާފައިވާކަމުގެ މައްސަލަތައް ވަނީ ފެންމަތިވެފައެވެ.
ޕީއެންސީން މިއަދު ނެރުނު ބަޔާނެއްގައި ބުނީ މެމްބަރުން އިތުރުކުރުމުގެ ހަރަކާތް ހިންގީ ޕާޓީގެ އެކްޓީވިސްޓުންނާއި ފާޓީއަށް ހެތޮ އެދޭ ފަރާތްތަކުގެ ބައިވެރިވުމާއިއެކުގައިކަމަށެވެ. އެގޮތުން ޕާޓީގެ ފަރާތުން އިސީއަށް ހުށއެޅި އެތައް ހާސް ފޯމެއްގެ ތެެރޭގައި މަދުން ނަމަވެސް ސައްހަ ނޫން ފޯމްތައް ހުށައެޅިފައިވާކަން އެ ޕާޓީއަށް ފާހަގަވެފައިވާކަމަށް ޕީއެންސީ ނެރުނު ބަޔާނުގައިވެއެވެ.
ޕީއެންސީ ބުނީ އެޕާޓީގެ މެމްބަރުން އިތުރުކުރުމަށް ހިންގި ހަރަކާތަކީ ރާއްޖޭގައި މިހާތަނަށް އެއް ފަހަރާ އެންމެ ގިނަ އަދަދަކަށް ސީޔާސީ ޕާޓިއަކަށް މެމްބަރުން ވަނުމަށް ފޯމް ހުށައެޅި ހަރަކާތްކަމަށެވެ. އެހެންކަމުން ޕާޓީގައި ފޯމްތަކުގެ ސައްހަކަން ކަށަވަރުކުރުމުގެ ގާބިލުކަން ނެތްކަމަށާއި އެކަން ކުރެވެނީ އިލެކްޝަނަށް ފޯމު ހުށައަޅާ ފަހުންކަމަށް ޕީއެންސީގެ ބަޔާނުގައިވެއެވެ. އަދި މިކަމަކީ ރާއްޖޭގެ ވަސީލަތްތައް ހުރި ގޮތުން އެ ޕާޓީއަށް އެކަނި އޮތް ގޮންޖެހުމެއް ނޫންކަމަށްވެސް ޕީއެންސީގެ ބަޔާނުގައިވެއެވެ.
ޕީއެންސީ ހުށައެޅި ފޯމުތަކުގައި ސައްހަ ނޫން ފޯމްތައް ހުރުމުން އެކަމުގެ ޝަކުވާ އީސީއާއި ފުލުހުންގެ ހިދުމަތުގައި ލޮގްކުރެވި އެ މައްސަލަތައް ބަލަމުން އަންނަކަން އެ މުއައްސަސާތަކުން ޕާޓީއަށް އަންގާފައިވާކަމަށްވެސް ޕީއެންސީ ނެރުނު ބަޔާނުގައިވެއެވެ.
ޕީއެންސީއަށް މެމްބަރުން ިއތުރުކުރުމަށް ހިންގި ހަރަކާތަކީ ރައީސް ޑރ. މުއިއްޒުގެ އެދިވަޑައިގަތުމަށް ހިންގި ހަރަކާތެއްކަމަށް އެ ޕާޓީން ވަނީ ބުނެފައެވެ. އެ ހަރަކާތުގައި ޕާޓިގެ މެްމބަރުންގެ އަދަދު 80000 މައްޗަށް އަރާފައިވާކަމަށް އެ ޕާޓީން ވަނީ ބުނެފައެވެ.
