މި މައްސަލަ މަޖިލީހަށް ހުށަހަޅާފައި ވަނީ ގަލޮޅު އުތުރު ދާއިރާގެ އެމްޑީޕީގެ މެންބަރު މުހައްމަދު އިބްރާހިމް މަޖިލީހުގެ ރައީސް އަބްދުއްރަޙީމް އަބްދުﷲއަށް ފޮނުވި ސީޓީއަކުންނެވެ.
އެ ސިޓީގައި ވާގޮތުން މިދިޔަ ސަރުކާރުގައި، ސަރުކާރު ހިއްސާވާ ކުންފުންޏެއްގެ ގޮތުގައި ޓްރޭޑްނެޓު އުފެއްދީ ނޭޝަނަލް ސިންގަލް ވިންޑޯއެއްގެ ގޮތުގައި ހަރަކާތްތެރިވުމަށް ކަމަށާ މިކަމަށް ޓްރޭޑް ނެޓުން ޖަވާބްދާރީ ވާން ޖެހޭނެ ކަމަށެވެ. އެހެނީ މިދިޔަ އަހަރާ ހަމައަށް ވަންގަވް މެދުވެރިކޮށް ޚިދުމަތްތައް ދެމުން ދިޔައީ ދައުލަތުގެ 14 އިދާރާއަކުން ކަމަށާ ރައްޔިތުންގެ އަސާސީ ބޭނުންތަކާ ގުޅިފައިވާ ގިނަ އިދާރާތަކުން މި ވަންގަވް އާއި ނުގުޅޭކަމަށެވެ.
ދައުލަތުގެ ބައެއް އިދާރާތަކުން އަމިއްލަ ވިއުގަތައް ގާއިމުކުރަމުން އަންނަ ކަމަށާއި މިއީ ކޮރަޕްޝަނަށް މަގުފަހިވެ، މަސައްކަތުގެ ސްޕީޑާއި އެފިޝިއެންސީއަށް އަސަރުކުރާނެ ކަމެއް ކަމަށްވެސް ސިޓީގައި ބުނެފައިވެއެވެ.
ވަންގަވް ޕްލެޓްފޯމްގެ ދަށުން ސަރުކާރުގެ ހުރިހާ އިދާރާއަކަށް އެއްވިޔުގަ އެއްގެ ދަށުން ހިދުމަތް ދެވޭނެ މަގު ފަހިވެފައިވާއިރު ވަކި ވަކި ވިއުގަ ތަކެއް ގާއިމު ކުރުމުން ސަރުކާރުގެ ބަޖެޓުންވެސް މިކަމަށް ދާނި ބޭކާރު ރުފިޔާ ތަކެއް ހަރަދު ވަމުން ކަމަށް އޭނާގެ ސިޓީގައި ފާހަގަ ކޮށްފައިވެއެ.
އޭގެ އިތުރުން އޭނާ ގެ ސިޓީގައި ވަންގަވްގައި ބައިވެރިނުވާ އިދާރާތަކުން އެ ވިއުގައިގައި ބައިވެރިނުވާ ސަބަބުތަކާއި އެކަމަށް ހުރަސްތަކެއް ހުރިނަމަ، އެކަންތައްތައް ދެނެގަނެގެން ހައްލުތައް ހޯދުމަކީ ކޮންމެހެން ކުރަން ޖެހޭ ކަމެއް ކަމަށް ދެކޭ ކަމަށް ބުނެފައި ވެއެވެ.
