ރަސްމާދޫ ރައްޔިތުންނާއެކު މިއަދު ރައީސް ބޭއްވި ބައްދަލު ކުރުމުގައި ރަށުގެ ރައްޔިތުންގެ ފަރާތުން ފާހަގަ ކުރާ އެންމެ ބޮޑު މައްސަލައެއްގެ ގޮތުގައި ރަށު ކައުންސިލްގެ ރައީސް މުހައްމަދު އާސިފް ފާހަގަކުރެއްވީ އެރަށުގައި ހުރި އުރީދޫގެ އެންޓަނާގެ މައްސަލަކަމަށެވެ.
އެގޮތުން 2005 ވަނަ އަހަރު އެންޓާނާ ބަހައްޓަން އޭރުގެ ވަތަނިއްޔާ މިހާރުގެ އުރީދޫއަށް ދިން ބިމުގެ މުއްދަތު 2020 ހަމަވެފައިވާކަމަށާއި އެހެން ނަމަވެސް އެ ބިމުގެ ބަދަލުގައި އެންޓަނާ އެހެން ސަރަހައްދަކަށް ބަދަލު ކުރަން ރައްޔިތުން އެދެމުންދާ ކަމަށް އާސިފް ވިދާޅުވި އެވެ.
ރަސްމާދޫ ރައްޔިތުންނާއި ބައްދަލުކުރައްވާ ރައީސް ޑރ. މުއިއްޒު ވާހަކަ ދައްކަވަނީ
ރަސްމާދޫ ރައްޔިތުންގެ ފަރާތުން ކައުންސިލްގެ ރައީސް ދެއްކެވި ވާހަކަތަކަށް ޖަވާބު ދެއްވަމުން ރައީސް ޑރ. މުއިއްޒު ވިދާޅުވީ ރަސްމާދޫ އެންޓަނާގެ މައްސަލަ ހައްލުކޮށްދެއްވާނެކަމަށެވެ. އަދި މާލެ ވަޑައިގެން ވީހާވެސް އަވަހަކަށް އެކަމާއި އުޅުއްވާނެކަންވެސް ރައީސް ފާހަގަކުރެއްވިއެވެ.
ސީއެންއެމްއަށް އެނގިފައިވާގޮތުގައި ރަސްމާދޫގައި ހުރި އުރީދޫގެ އެންޓަނާ މައްސަލަ ހައްލު ކުރުމުގެ މަސައްކަތް މިދިޔަ ސަރުކާރާއެކު ވެސް އުރީދޫން ވަނީ ކޮށްފަ އެވެ. އަދި މިހާރު ސަރުކާރުގެ ކަމާބެހޭ މިނިސްޓަރަށް ވެސް މި ކަމާބެހޭގޮތުން މަޝްވަރާ ކުރެވިފައިވާ ކަމަށާއި އުރީދޫއަށް ފާހަގަވާ ކަންކަން ވަޒީރަށް ދަންނަވާފައިވާކަން ސީއެންއެމްއަށްވަނީ އެނގިފަ އެވެ.
