އޮފީސް ޓެލެޑްރާމާ މުބާރާތުގައި ބައިވެރިވާން ހުޅުވާލާފައިމިވަނީ ފަސް އަހަރުގެ މެދުކެނޑުމަކަށް ފަހުގައެވެ.
މުބާރާތުގަިއ ބައިވެރިވުމަށް ފުރަތަމަ ހުޅުވާލި މިމަހުގެ 12 ވަނަ ދުވަހާ ހަމައަށެވެ. އެންސީއޭއިން ބުނީ މިމުބާރާތުގެ ބައިވެރިވުމަށް ޝައުގުވެރިވާ ފަރާތްތަކަށް މި މަހުގެ 26 ވާ އާދިއްތަ ދުވަހުގެ 13:30ގެ ނިޔަލަށް ފޯމް ހުށަހެޅުމުގެ ފުރުސަތު މިހާރު ވަނީ ހުޅުވާލެވިފައި ކަަމަށެވެ.
މި މުބާރާތުގައި ބައިވެރިވުމަށް އެދޭ ފޯމް އެންސީއޭ އިން ލިބޭނެއެވެ. އަދި ވެބްސައިޓުން ވެސް ޑައުންލޯޑް ކުރެއްވޭނެއެވެ.
ނޭޝަނަލް ސެންޓާ ފޯ އާޓްސް (އެންސީއޭ) އިން ބާއްވާ މި މުބާރާތަކީ މުނިފޫހިފިލުވުމުގެ ދާއިރާއަށް ފަންނާނުން އިތުރުކޮށް، ފަންނުވެރީންނަށް ހިތްވަރުދީ، އަގުވަޒަންކޮށް، އެކުވެރި ވާދަވެރި މަހައުލެއްގައި ފަންނުވެރިކަން ތަރައްގީކޮށް ދެމެހެއްޓުމުގެ މަގްސަދުގައި ބާއްވަމުން އަންނަ މުބާރާތެކެވެ.
"އެން.ސީ.އޭ - އޮފީސްތަކުގެ ޑްރާމާ މުބާރާތް 1446" ގައި ބައިވެރިވުމުގެ ފުރުސަތު މުޅި ރާއްޖެއަށް މިހާރު ހުޅުވާލާފައިވާއިރު މިމުބާރާތުގައި ބައިވެރިވެވޭނީ ސަރުކާރު އޮފީސްތަކާއި މިނިވަން މުވައްސަސާތަކާއި ސަރުކާރު ހިއްސާވާ ކުންފުނިތަކުގެ އިތުރުން ރަށު ކައުންސިލް، އަތޮޅު ކައުންސިލް އަދި ސިޓީ ކައުންސިލްތަކަށެވެ.
އެން.ސީ.އޭއިން އާއްމުކޮށްފައިވާ އުސޫލުގައި މި މުބާރާތުގައި ހޮވާނެ ވަނަތަކާއި އިނާމްތަކުގެ ތަފްސީލުވެސް ވަނީ ހިމަނާފައެވެ. އެގޮތުން ޖުމްލަ 14 ވަނައެއް ހޮވާގޮތަށް ވަނީ ހަމަޖެހިފައެވެ.
ފައިސާގެ އިނާމު ހުށަހަޅާފައިވާ އެވޯޑްތައް:
• އެންމެ މޮޅު ޑްރާމާ - 50،000 ރުފިޔާ
• އެންމެ މޮޅު އެކްޓަރ (އަންހެން) - 15،000 ރުފިޔާ
• އެންމެ މޮޅު އެކްޓަރ (ފިރިހެން) - 15،000 ރުފިޔާ
• އެންމެ މޮޅު ސަޕޯޓިންގ އެކްޓަރ (އަންހެން) - 10،000 ރުފިޔާ
• އެންމެ މޮޅު ސަޕޯޓިންގ އެކްޓަރ (ފިރިހެން) - 10،000 ރުފިޔާ
• އެންމެ މޮޅު ނިއު ކަމަރ (އަންހެން) - 5000 ރުފިޔާ
• އެންމެ މޮޅު ނިއު ކަމަރ (ފިރިހެން) - 5000 ރުފިޔާ
މި މުބާރާތުގެ ޑްރާމާތައް ދައްކަން ފަށާނީ ރޯދަ މަސްތެރޭގަ އެވެ.
