އެމަނިކުފާނު މިކަން އިުލާންކުރެއްވީ މިހާރު ރ. އަތޮޅަށް ކުރައްވާ ދަތުރުފުޅުގައި ފައިނު ރައްޔިތުންނާ ބައްދަލުކުރައްވާ މިއަދު ވާހަކަ ދައްކަވަމުންނެވެ. ފައިނުގައި އެއާޕޯޓެއް އެޅުން އެއީ ރައީސް ޑރ. މުހައްމަދު މުއިއްޒުގެ ރިޔާސީ ވައުދުފުޅެކެވެ.
ފައިނު ރައްޔިތުންނާއި ވާހަކަ ދައްކަވަމުން ރައީސް ވިދާޅުވީ ފައިނު އެއާޕޯޓް އެޅުމުގެ މަސައްކަތް އެމްޓީސީސީއާ ހަވާލުކޮށް އަންނަމަހު އެކަމުގެ އެއްބަސްވުމުގައި ސޮއިކުރާނެކަމަށެވެ. އަދި އަމަލީ މަސައްކަތް ވަރަށް އަވަހަށް ފައްޓަވާނެކަމުގެ ޔަގީންކަންވެސް ރައީސް ދެއްވިއެވެ.
ރައީސް ޑރ. މުއިއްޒު ވިދާޅުވީ ފައިނުގެ އެއާޕޯޓް އެޅުމަށް ކުރީ ސަރުކާރުން ހުރަސް އެޅުމުގެ ގޮތުން ބައެއް ކަންކަން ހިންގާފައިވާކަމަށެވެ. އެގޮތުން އެއާޕޯޓް އަޅާ ސަރަހަހައްދަށް ރައްޔިތުންނާއި ގުޅުން ހުރި ބައެއް މަޝްރޫއުތައް ކުރީ ސަރުކާރުން ވައްދާފައިވާކަމަށް ރައީސް މުއިއްޒު ވިދާޅުވިއެވެ.
ފައިނަށް ރައީސް ވަޑައިގަތުމުން އެރަށު ރައްޔިތުން އެމަނިކުފާނަށް މަރުހަބާ ކިޔަނީ
ރައީސް ވިދާޅުވީ ފައިނު އެއާޕޯޓްގެ ސަބަބުން ވަރަށް ނަ ވަޒީފާތައް އުފެދި އެ ސަރަހައްދަށް ގިނަ ރިސޯޓުތަކެއް އައުމަށް މަގުފަހިވެގެންދާނެކަމަށެވެ. އަދި ރ. އަތޮޅުގައި ގިނަ ރިސޯޓްތަކެއް ހަދަން އެމަނިކުފާނު ވެވަޑައިގެންފައިވާ ވައުދުގެ ހަނދާން އާކުރައްވަމުން ވިދާޅުވީ ފައިނުގެ އެއާޕޯޓް ވެގެންދާނީ އުއްމީދީ އެއާޕޯޓަކަަށްކަމަށެވެ.
ފައިނުގައި އެއާޕޯޓް އަޅާނެކަމުގެ ޔަގީންކަން ރައީސް ޑރ. މުއިއްޒު ދެއްވާފައި މިވަނީ އެކަމާއި ދެކޮޅަށް ތިމާވެށިގެ ބައެއް ޖަމިއްޔާތަކާއި އާއްމުން މީގެ ކުރިންވެސް އަޑު އުފުލާފައި ވަނިކޮށެވެ. އެ ޖަމިއްޔާތަކުން ބުނީ ފައިނުގައި އެއާޕޯޓް އަޅަން ނަގާ ސަރަހައްދުގެ ސަބަބުން ރަށުގެ ދަނޑުވެރިކަމަށް ގެއްލުންވެ ރަށުގެ ހިތްގައިމުކަންވެސް ގެއްލިގެން ދާނެކަމަށެވެ.
ފައިނުގައި އެއާޕޯޓް އެޅުމާއި ދެކޮޅަށް ހިންގި ސޭވް ފައިނު ކެމްޕެއިންގެ ފޮޓޯއެއް
ފައިނުގައި އެއާޕޯޓަކާއި ސިޓީ ހޮޓަލެއް އަޅަން ފުރަތަމަ ނިންމީ ރައީސް އަބްދުﷲ ޔާމީންގެ ސަަރުކާރުގައެވެ. އެހެންނަމަވެސް އޭގެ ފަހުން އައި އެމްޑީޕީ ވެރިކަމުގައި ރައީސް އިބްރާހިމް މުހައްމަދު ސާލިހް ނިންމީ އެ އެއާޕޯޓް އެ އަތޮޅު ބެރިޔަންފަރަށް ބަދަލުކުރާށެވެ.
