ޗެމްޕިއަންސް ލީގުގައި ރޭ ޕީއެސްޖީން މޮޅުވީ މެންޗެސްޓާ ސިޓީން ދެ ލަނޑު ޖަހާފައި އޮއްވާ ފަހަތުން އަރައި ހަތަރު ލަނޑު ޖަހާފައެވެ. މި މެޗާއެކު، މުބާރާތުގެ ލީގު ބުރުން ކެޓުމުގެ ބިރު ސިޓީ އަށްވަނީ ކުރިމަތިވެފައެވެ.
ސިޓީ އޮތީ ހަތް މެޗުން އަށް ޕޮއިންޓާ އެކު ޗެމްޕިއަންސް ލީގުގެ 25 ވަނައިގަ އެވެ. މާނައަކީ އެ ޓީމަށް ގަދަ 16 ޓީމު ބުރުން ސީދާ ޖާގައެއް ވެސް، އަދި ނޮކްއައުޓް ބުރުން ސީޑުގައި ކޮށްފައިވާ ޖާގައެއް ވެސް ނުލިބޭނެ އެވެ. އެ ޓީމަށް ނޮކްއައުޓް ބުރުގެ ސީޑުނުކުރާ ޖާގައެއް ލިބުނަސް ލިބޭނީ ފަހު މެޗުގައި ބެލްޖިއަމްގެ ކްލަބް ބުރުގާ އަތުން މޮޅުވެގެންނެވެ.
ޕީއެސްޖީ ވަނީ 10 ޕޮއިންޓް ހަމަކޮށް 22 ވަނަ އަށް އަރައިފަ އެވެ. އެ ޓީމަށް ވެސް ގަދަ 16 ޓީމުގެ ބުރުން ސީދާ ޖާގައެއް ދެން ނުލިބޭނެ އެވެ. އެކަމަކު އަދިވެސް، ނޮކްއައުޓް ބުރުން ސީޑުކޮށްފައިވާ ޖާގައެއް ލިބިދާނެ އެވެ.
ސިޓީ އަށް މި ސީޒަނުގައި މިހާތަނަށް ޕްރިމިއާ ލީގުގައި ވެސް ލިބިފައިވަނީ ދަށް ނަތީޖާތަކެކެވެ.
