އަސްލު ޓީވީއަށް ދެއްވި އިންޓަވިއުއެއްގައި މޭޔަރު ނިޒާރު ވިދާޅުވީ، އައްޑޫގެ އިގްތިސާދީ ހާލަތު ރަނގަޅުވެގެން ދާނީ ޓޫރިޒަމް ދާއިރާ ތަރައްގީވެގެން ކަމަށެވެ. އަދި މިކަމަށް އެންމެ ބޮޑު ބަދަލެއް ގެނެސްދޭނީ ހަންކެޑަ އިންޓަގްރޭޓެޑް ޓޫރިޒަމް ޑިވެލޮޕްމަންޓް ޕްރޮޖެކްޓް ކަމަށް ވެސް އެމަނިކުފާނު ވިދާޅުވިއެވެ.
މޭޔަރު ނިޒާރު ފާހަގަކުރެއްވި ގޮތުގައި މިހާރުވެސް އައްޑޫ ސިޓީގެ ތަރައްގީއަށް ގިނަ މަޝްރޫއުތަކެއް ކުރިއަށްދެއެވެ. އޭގެ ތެރޭގައި މަގު ހެދުމާއި، އެއަރޕޯޓްގެ މަސައްކަތްތަކާއި، ފެން ހިންދާ ނިޒާމުގެ މަސައްކަތް ހިމެނެއެވެ. އަދި ޓޫރިޒަމްގެ ކަންކަން ކުރިއެރުވުމަށް ކައުންސިލުން ހާއްސަ މަސައްކަތްތަކެއް ކުރަމުންދާ ކަމަށް ވެސް އެމަނިކުފާނު ވިދާޅުވިއެވެ.
ސަރުކާރުން އައްޑޫގައި ކުރަން ނިންމާފައިވާ މަޝްރޫއުތައް މި އަހަރުގެ ތެރޭގައި ނިމިގެންދާނެ ކަމަށް އުންމީދުކުރައްވާ ކަމަށް މޭޔަރު ނިޒާރު ވިދާޅުވިއެވެ.
