ކުންފުނިން ނެރުނު ބަޔާނެއްގައި ބުނެފައިވަނީ ރަސްމާލެ ހިއްކުމުގެ މަޝްރޫއު ފުރަތަމަ އެއްބަސްވި ގޮތަށް ނުދިޔުމުން، އެކަމާ ގުޅޭ ސެޓްލްމަންޓް އެއްބަސްވުމެއް ހަދައި، ދެ ފަރާތުން އެއްބަސްވި ގޮތަށް މަސައްކަތް ނިންމާފައިވާ ކަމަށެވެ. މީގެ ތެރޭގައި ހިމެނެނީ ސައިޓް ޖޭގެ ބިން ހިއްކުމާއި ޝޯ ޕްރޮޓެކްޝަންގެ މަސައްކަތްތަކެވެ.
ބައެއް މީޑިއާތަކުން ރިޕޯޓުކޮށްފައިވާ ގޮތުގައި ސީއެމްސީސީއަށް 21 މިލިއަން ޑޮލަރު ދޭން ނިންމާފައިވެއެވެ. ނަމަވެސް ސީއެމްސީސީން ބުނެފައިވަނީ އެޗްޑީސީން ފައިސާ ދޭންޖެހޭނީ ފަހުން އެއްބަސްވި ގޮތަށް ކުރާ މަސައްކަތްތަކަށް އެކަނި ކަމަށެވެ. އަދި މިއީ ގެއްލުމުގެ ބަދަލުގެ ގޮތުގައި ދޭ ފައިސާއެއް ނޫން ކަމަށާއި، އިތުރު ފައިސާ ދިނުމަށް އެއްބަސްވެފައިވާ އެއްވެސް އެއްބަސްވުމެއް ނެތް ކަމަށެވެ.
ސީއެމްސީސީން އިތުރަށް ބުނެފައިވަނީ އެ ކުންފުނީގެ އަގު ވެއްޓޭ ގޮތަށް ހަގީގަތާ ހިލާފު ވާހަކަތައް ނުފެތުރުމަށް އެދޭ ކަމަށެވެ. އަދި މިކަމާ ގުޅޭ މައުލޫމާތު ސަރުކާރުން ނުވަތަ އެޗްޑީސީން ސާފުކޮށް އާންމުކޮށް ހާމަކުރުމަށް ވެސް އެދިފައިވެއެވެ.
