ސްޓެލްކޯއިން ބުނީ މި ފަހަރު ވައްކަން ކުރަން މަސައްކަތްކޮށްފައިވަނީ މާފަންނު މަދުރަސާ ސަރަހައްދުގައި ހުރި ޓްރާންސްފޯމަރު ސަބްސްޓޭޝަނަށް ވަދެކަމަށެވެ.
ރޭ ދަންވަރު 2:50ގައި ހާއިރު ޓްރާސްފޯމަރަށް ވަދެ ވައްކަން ކުރަން އުޅުނު މަންޒަރު ސީސީޓީވީ ކެމެރާއިން ފެނިގެން ފުލުހުންނަށް އެންގުމުން ފުލުހުން އައިސް އެމީހާ ހައްޔަރުކުރިކަމަށް ސްޓްލެކޯއިން ބުނެއެވެ.
މިމަހުގެ 14 ވަނަދުވަހު ހުޅުމާލޭގެ ހުރި ޓްރާންސްފޯމަަކުން ވައްކަން ކުރަން އުޅުނު މީހަކުވެސް އަތުލައިގެންފައެވެ. އެ ފަހަރު ޓްރާންސްފޯމަރަކަށް ގެއްލުންދީ އޭގެން ވައްކަން ކުރަން އުޅުނު މީހާ އަތުލައިގަތީ ސްޓެލްކޯގެ މުވައްޒަފުންނެވެ. އެމީހާ ހުއްޓުވަން ނުކުތް ސްޓެެލްކޯގެ މުވައްޒަފަކަށް ވަގުކަލޭގެ ވަނީ ރެންޗުން ހަމަލާދީ ޒަހަމްކޮށްލާފައެވެ.
މާލޭގެ ސަބްސްޓޭޝަންތަކަކީ 24 ގަޑިއިރު ކެމެރާއިން މޮނިޓަރ ކުރެވޭ ތަންތަން ނަމަވެސް، ހުޅުމާލޭގެ ދެވަނަ ދިޔަވަހީގެ ސަބްސްޓޭޝަންފަދަ ތަންތަނުން ކުރެވޭ މިފަދަ ވައްކަންތައް ހުއްޓުވުމަށް އާންމު ރައްޔިތުންގެ އެހީތެރިކަން ބޭނުންވާކަމަށް ސްޓެލްކޯއިން ބުނެއެވެ.
ފަހަކަށް އައިސް ސްޓެލްކޯގެ ޓްރާންސްފޯމަރުތަކުން ވައްކަން ކުރުމާއި އެތަކެއްޗަށް ގެއްލުން ދިނުމުގެ މައްސަލަތައް ވަނީ އިތުރުވެފައެވެ. ހުޅުމާލޭގައި ހުރި ޓްރާންސްފޯމަރަކު ވައްކަން ކުރަން އުޅުމުގެ ތެރޭގައި މިދިޔަ އަހަރު މީހަކުވެސް ވަނީ މަރުވެފައެވެ.
