މި މަސައްކަތަކީ ކުދި ވިޔަފާރިތައް ކުރިއެރުވުމަށް ސަރުކާރުން ކުރިއަށްގެންދާ މަސައްކަތްތަކުގެ ތެރެއިން އެއް މަސައްކަތެވެ.
އިކޮނޮމިކް މިނިސްޓަރު މުހައްމަދު ސައީދު ވިދާޅުވީ މިއަހަރަކީ ކުދި ވިޔަފާރިތަކަށް ގިނަ ފުރުސަތުތަކެއް ހުޅުވިގެންދާނެ އަހަރެއް ކަމަށެވެ. އެގޮތުން ޓްރޭޑްމާކް އަދި ބްރޭންޑް ރައްކާތެރިކުރުމުގެ ގޮތުން ގާނޫނީ އޮނިގަނޑެއް އެކުލަވާލެވޭނެ ކަމަށް އޭނާ ވިދާޅުވިއެވެ. އަދި އޮންލައިން ވިޔަފާރިތަކަށް މީގެ ކުރިން ނުލިބޭ ފުރުސަތުތަކެއް މިއަހަރު ތެރޭގައި ހުޅުވިގެންދާނެ ކަމަށްވެސް އޭނާ ވިދާޅުވިއެވެ.
މި މަސައްކަތްތަކުގެ އިތުރުން، އުފެއްދުންތެރިކަމުގެ މައުރަޒު 2025 ގެ ނަމުގައި މެއި 23 އިން 31 އަށް ހުޅުމާލޭ ސެންޓްރަލް ޕާކުގައި މައުރަޒެއް ބޭއްވުމަށް ވަނީ ހަމަޖެހިފައެވެ. މި މައުރަޒަކީ ދިވެހި އުފެއްދުންތެރިންނަށް އާ ބާޒާރުތައް ހޯދައިދިނުމަށާއި، ބައިނަލްއަގުވާމީ ވިޔަފާރިތަކާއި އިންވެސްޓަރުންނާ ގުޅުން ބަދަހިކުރުމަށް ބޭއްވޭ މައުރަޒެކެވެ.
މައުރަޒު ރާވައި ހިންގާ ބިޒްނަސް ސެންޓާ ކޯޕަރޭޝަން (ބީސީސީ) އިން ބުނީ މި މައުރަޒަކީ ރާއްޖޭގައި ހުރި ވިޔަފާރީގެ ފުރުސަތުތަކާއި ކުދި ވިޔަފާރިތައް އެހެން ވިޔަފާރިތަކާ ގުޅުވައިދޭ ޕްލެޓްފޯމަކަށް ވެގެންދާނެ ކަމަށެވެ.
