
އޭދަފުށީ ކައުންސިލުން ބުނީ އެރަށުން ދޫކުރުމަށް ހަމަޖެހިފައިވާ 183 ގޯއްޗަށް އެދި ފޯމު ހުށައެޅި ފަރާތްތަކަށް ޕޮއިންޓް ލިބިފައިވާ ގޮތުގެ ވަގުތީ ލިސްޓް އިސްލާހުކުރުމަށްފަހު އަލުން އާއްމުކޮށްފައިވާކަމަށެވެ.
މިލިސްޓަށް ޝަކުވާ ހުށަހެޅުމުގެ ފުރުސަތި އިއްޔެއިން ފެށިގެން މިމަހުގެ 11 ވަނަ ދުވަހުގެ ނިޔަލަށް ހުޅުވާލާފައިވާކަމަށް އޭދަފުށީ ކައުންސިލުން ބުނެއެވެ. ޝަކުވާ ހުށައެޅޭނީ ރަސްމީ ކޮންމެ ދުވަހަކު ހެނދުނު 8:30 ން މެންދުރުފަހު 13:00 އާއި ހަމައަށްކަމަށްވެސް އެ ކައުންސިލުން ބުނެއެވެ. ލިސްޓަށް އަނގަބަހުންނާއި ފޯނު މެދުވެރިކޮށް ހުށަހަޅާ ޝަކުވާތައް ބަލައިނުގަންނާނެކަމަށްވެސް ކައުންސިލުން ބުނެއެވެ.
ލިސްޓަށް ޝަކުވާ ހުށަހަޅަންވާނީ، ސިޓީއަކުން ކައުންސިލް އިދާރާއަށްކަމަށާއި އަދި އީމެއިލް މެދުވެރިކޮށްވެސް ޝަކުވާ ހުށައެޅޭނެކަމަށްވެސް އޭދަފުށީ ކައުންސިލުން ބުނެއެވެ.
ޝަކުވާ ސިޓީ ހުށަހަޅުއްވާއިރު، އެފަރާތަކާއި ގުޅޭނެ ފޯނު ނަންބަރާއި، އައި.ޑީ ކާޑު ނަންބަރު ޖަހާފައި އޮންނަންވާނެކަމަށް އޭދަފުށީ ކައުންސިލުން ބުނެއެވެ.
އޭދަފުށިން ގޯތި ދިނުން ލަސްލާތީ އެރަށު ރައްޔިތުން ތެރެއިން ބަޔަކު ނުކުމެ ވަނީ މުޒާހަރާކޮށްފައެވެ.