އެކަން އިއުލާންކޮށް މިއަދު އިމިގްރޭޝަނުން އެކްސްގައި ކުރި ޕޯސްޓެއްގައި ބުނީ މާދަމާ ސަރުކާރު ބަންދު ދުވަހެއްގެ ގޮތުގައި ކަނޑައަޅާފައިވަނީ މިއަހަރުގެ ރައްޔިތުންގެ މަޖިލިސް ހުޅުވުމުގެ ރަސްމިއްޔާތު އޮންނާތީ ކަމަށެވެ . ނަމަވެސް، އިމިގްރޭޝަނުން ނިންމާފައިވަނީ މާލެ ސަރަޙައްދުގައި ހިމެނޭ އެ އިދާރާގެ ތިން އޮފީހަކުން ޕާސްޕޯޓުގެ ހިދުމަތް ދިނުމަށެވެ.
މި ހިދުމަތް ލިބޭނެ ތަންތަނަކީ:
1. ވެލާނާގޭގައި ހުންނަ އިމިގްރޭޝަންގެ މާލޭ އޮފީސް
2. ހުޅުމާލެ ފޭސް 1 ގައި ހުންނަ އުމަރު ޒާހިރު ބިލްޑިންގްގެ އިމިގްރޭޝަން އޮފީސް
3. ހުޅުމާލެ ފޭސް 2 ގެ ވިނަރެސްގައި ހުންނަ އިމިގްރޭޝަންގެ އޮފީސް
އިމުގާ ޕޯޓަލް މެދުވެރިކޮށް 24 ގަޑިއިރު ޕާސްޕޯޓަށް އެދި ހުށަހެޅުމުގެ ފުރުސަތު އޮންނާނެއެވެ. އަދި 65 އަހަރުން މަތީގެ ފަރާތްތަކަށް ހެނދުނު 9:00 އިން މެންދުރު 13:00 އަށް އިމިގްރޭޝަން އޮފީހަށް ހާޒިރުވެ ޕާސްޕޯޓަށް އެދި ހުށަހެޅުމުގެ ފުރުސަތު ލިބިގެންދާނެއެވެ.
މީގެ އިތުރުން، މާދަމާ ހެނދުނު 8:30 އިން މެންދުރުފަހު 14:00 އަށް ޕާސްޕޯޓާ ހަވާލުވުމަށް ނަންބަރު ދޫކުރެވޭނެ ކަމަށް އިމިގްރޭޝަނުން މައުލޫމާތު ދީފައިވެއެވެ.
މި ހިދުމަތް މެދުނުކެނޑި ކުރިއަށް ގެންދިއުމަށް އިމިގްރޭޝަނުން ނިންމާފައިވަނީ ރައްޔިތުންނަށް ފަސޭހަކަމާއެކު މުހިންމު ހިދުމަތްތައް ފޯރުކޮށްދިނުމުގެ މަގްސަދުގައި ކަމަށް ބެލެވެއެވެ. މި ނިންމުމަކީ ދަތުރުފަތުރަށް ތައްޔާރުވަމުންދާ ފަރާތްތަކަށް ލުއިފަސޭހަކަމެއް ގެނެސްދޭނެ ކަމެއް ކަމުގައި ފާހަގަކުރެވެއެވެ.
