މަޖިލީހުގެ މާލިއްޔަތު ކޮމިޓީގައި ވާހަކަދައްކަވަމުން އޮޑިޓާ ޖެނެރަލް ބުނީ، މި މަޝްރޫއުގެ ބީލަން މަރުހަލާތައް ގެންގޮސްފައިވަނީ އުސޫލުތަކާ ހިލާފަށް ކަމަށެވެ. އެގޮތުން އެއް ފަރާތަކަށް ނިސްބަތްވާ ތިން ކުންފުންޏަކަށް މަސައްކަތް ހަވާލުކޮށް، 680 މިލިއަން ރުފިޔާ އެ ކުންފުނިތަކަށް ދައުރުކޮށްފައިވާކަން ފާހަގަކުރެއްވިއެވެ.
މި މަޝްރޫޢަކީ 2013 ވަނަ އަހަރު 580 މިލިއަން ރުފިޔާއަށް ފެށި މަޝްރޫޢެއް ނަމަވެސް، މިހާރު އެ މަޝްރޫއުގެ ހަރަދު 1 ބިލިއަން ރުފިޔާއަށް އަރާފައިވާކަން އޮޑިޓާ ޖެނެރަލް ފާހަގަކުރެއްވިއެވެ. އަދި އޭރުގެ މާކެޓް އަގަށް ބަލާއިރު 240-354 މިލިއަން ރުފިޔާ އިތުރަށް ހަރަދުކޮށްފައިވާކަމަށް ވިދާޅުވިއެވެ.
މަޝްރޫއުގެ ބީލަން މަރުހަލާތަކާ ގުޅޭ ލިޔެކިޔުންތައް ނެތްކަމަށް ޕޮލްކޯއިން ބުނެފައިވާކަމަށާއި، އެކަމާ ގުޅޭ އެއްވެސް މައުލޫމާތެއް ގެޒެޓުންވެސް ފެންނަން ނެތްކަމަށް އޮޑިޓާ ޖެނެރަލް ވިދާޅުވިއެވެ. މި މައްސަލައަކީ އޭސީސީން މިހާރު ބަލަމުންދާ މައްސަލައެކެވެ.
