ކްލައިމެޓް ވަލްނަރަބަލް ފޯރަމް (ސީވީއެފް)ގެ ސެކްރެޓަރީ ޖެނެރަލްގެ ގޮތުގައިވެސް ހުންނެވި ނަޝީދު މިރޭ އެކްސްގައި ކުރެއްވި ޕޯސްޓެއްގައި ވިދާޅުވީ ރާއްޖޭގެ ވައި ނުސާފުވެ ތަޣައްޔަރުވެފައިވާތީ އެކަމުގެ ގެއްލުން ރާއްޖޭގެ ފަތުރުވެރިކަމަށް ކޮށްފާނެ ކަމަށެވެ.
މިދުވަސްވަރަކީ ރާއްޖޭގެ ފަތުރުވެރިކަމުގެ ޕީކް ސީޒަން ކަން ފާހަގަކުރައްވައި ނަޝީދު ވިދާޅުވީ ރާއްޖޭގެ ވައި ނުސާފުވެ ތަޣައްޔަރުވަނީ ކޮންމެ އަހަރަކު ވެސް މިދުވަސްވަރު ކަމަށެވެ.
އެޗްޕީއޭ އިން ބުނީ ވައި ނުސާފު ދުވަސްތަކުގައި، ފުއްޕާމެއާ ހިތުގެ ބަލިތައް ހުންނަ ފަރާތްތަކުން ބޭރުގައި ގިނަވަގުތު ހޭދަކުރުން ރަނަގަޅު ނޫން ކަމަށާއި، ބޭރަށް ނިކުންނަ ނަމަ މާސްކު އެޅުމަށް އިލްތިމާސްކުރާ ކަމަށެވެ. އަދި ކުޑަކުދިންނާއި ދޮށީ އުމުރުގެ މީހުންނާއި މާބަނޑު މީހުން ވެސް ބޭރުގައި ހޭދަކުރާ ވަގުތު މަދުކުރުމަށް ވަނީ އިލްތިމާސްކޮށްފަ އެވެ.
މީގެއިތުރުން ތުއްތު ކުދިން ބޭރަށް ނުނެރުމަށާއި ގޭގެ ދޮރުތައް ލައްޕާފައި ބެހެއްޓުމަށް އިސްކަންދިނުމަށް އެޗްޕީއޭ އިން އިލްތިމާސްކުރެ އެވެ. އަދި ބޭރުގައި ކުޅިވަރު ކުޅުމާއި ކަސްރަތުކުރުން ފަދަ ކަންކަން މިވަގުތަށް މަޑުޖައްސާލުމަށް ވެސް ވަނީ އިލްތިމާސްކޮށްފަ އެވެ.
ކޮންމެ އަހަރެއްގެ ޑިސެމްބަރު-ޖެނުއަރީ މަހު ރާއްޖޭގެ ވައި ނުސާފުވުން މިހާރު ވަނީ އާއްމުވެފަ އެވެ. މީގެ ސަބަބެއް ކަމަށް ތަޖުރިބާކާރުން ބުނަނީ، އިރުވައި މޫސުމުގެ އުތުރު ހަޅައިގެ ވަޔާ އެކު، އިންޑިއާގެ ދުންގަނޑުގެ އަސަރު ރާއްޖެއަށް ކުރުމެވެ.
އިންޑިއާގައި ދުން އުފެދެނީ ދަނޑު ހައްދަން އަންދާ އެންދުންތަކުގެ ސަބަބުންނެވެ.
ނަޝީދު ވިދާޅުވީ ރާއްޖޭގެ ވައި ތަގައްޔަރު ވަނީ އެހެން ގައުމުތަކުގެ ސަބަބުން ކަމަށްވާއިރު އެކަން ހައްލު ކުރުމަށް، އެކުގައި މަސައްކަތް ކުރަން ޖެހޭ ކަމަށެވެ.
