މިކަން މިއަދު ހާމަކުރެއްވައި މާލެ ސިޓީގެ މޭޔަރު އާދަމް އާޒިމް ވިދާޅުވީ، ރަސްފަންނުގެ އެއްބައިގެ މަސައްކަތް ކޮންޓްރެކްޓަރާ ހަވާލުކޮށްފައި އޮތް ނަމަވެސް، އެދެވޭ ގޮތުގައި މަސައްކަތް ކުރިއަށް ނުދާތީ އެ ނިންމުން ނިންމަން ޖެހުނު ކަމަށެވެ. އަދި މިހާރު އާ ކޮންޓްރެކްޓަރަކާ މަސައްކަތް ހަވާލުކުރެވި، މި ހަފުތާ ތެރޭގައި މަސައްކަތް ފެށޭނެ ކަމަށް އޭނާ ބުންޏެވެ.
މޭޔަރު އާޒިމް ވިދާޅުވީ ކުރިއަށް އޮތް ދެތިން މަސް ތެރޭގައި ރަސްފަންނުގެ މަސައްކަތް ނިމި، ރަނގަޅު ފެންވަރެއްގެ ބީޗަކަށް އެތަން ހެދޭނެ ކަމަށެވެ. އަދި އެތަން އިތުރަށް ވީރާނާވިޔަ ނުދިނުމަށް ޚާއްސަ ސަމާލުކަމެއް ދޭނެ ކަމަށް ވެސް އޭނާ ވިދާޅުވިއެވެ.
މާލޭގެ މުހިންމު އާންމު ތަނެއްގެ ގޮތުގައި ބޭނުންކުރަމުން އައި ރަސްފަންނުގެ ހާލަތު ދަށްވެފައިވާތީ، ގިނަ ރައްޔިތުން ވަނީ ކަންބޮޑުވުން ފާޅުކޮށްފައެވެ. އިއްޔެ ރައީސް މުހައްމަދު މުއިއްޒު ވެސް ރަސްފަންނަށް ޒިޔާރަތްކުރައްވައި، އެތަނުގެ ހާލަތު ރަނގަޅުކުރުމަށް އަވަސް ފިޔަވަޅުތަކެއް އަޅުއްވާނެ ކަމުގެ ޔަގީންކަން ރައްޔިތުންނަށް ދެއްވާފައިވެއެވެ.
