އެންވަޔަރަމަންޓް ޕްރޮޓެކްޝަން އެޖެންސީ (އީޕީއޭ) އިން ބުނީ މި އޮންލައިން ވެބިނާއަކީ ސަރުކާރުގެ މުހިންމު އިދާރާތަކާއި، ދޫނީގެ ކަންކަން ދިރާސާ ކުރާސާ ފަރާތްތަކާއި (އޯނިތޮލޮޖިސްޓު)، އިލްމުވެރިންނާއި، ދަރިވަރުންނާއި، ސީއެސްއޯތަކާއި، އަދި ޝައުގުވެރިވާ އެހެން ފަރާތްތައް އެއްތަނަކަށް އެއްކޮށްގެން ދޫނިތަކާއި އަތޮޅުތަކާ ބެހޭ އިލްމު ހިއްސާކުރުމަށް ބާއްވާ ވޯކްޝޮޕެއް ކަމަށެވެ. އަދި މި ވެބިނާތެރެއިން ރާއްޖޭގައި ހިމާޔަތްކޮށްފައިވާ ދޫނިތަކުގެ އޯވަވިއުއެއް ފޯރުކޮށްދިނުމާއި، ދިރާސަތަކުގެ ހޯދުންތައް ހިއްސާކުރެވިގެން ދާނެކަމަށް ވެސް އީޕީއޭއިން ބުނެއެވެ.
މި ވެބިނާ ކުރިއަށް ދާނީ މިމަހުގެ 27 ވާ ބުރާސްފަތި ދުވަހުގެ ހަވީރު 16:00 އިން އިރުއޮށްސި 18:00 އެވެ.
ދޫނީ ވާހަކާ ވެބިނާ އަކީ ޔުނިވާސިޓީ އޮފް އޯކްލެންޑާއި އައިލްސް ކޮންސަލްޓިން އާއި ގުޅިގެން އެންވަޔަރަންމަންޓަލް ޕްރޮޓެކްޝަން އެޖެންސީ (އީޕީއޭ) އަށް ކުރިއަށް ގެންދާ ރިވިއުގައި ހިމާޔަތްކޮށްފައިވާ ދޫނިތަކުގެ ސެގްމަންޓެކެވެ. އަދި މި ވެބިނާ ފަންޑް ކުރަނީ ޖޮއިންޓް ނޭޗާ ކޮންޒަވޭޝަން ކޮމިޓީ (ޖޭއެންސީސީ) ގެ އޯޝަން ކަންޓްރީ ޕާޓްނަޝިޕް ޕްރޮގްރާމް (އޯސީޕީޕީ) އިން ނެވެ.
ޝައުގުވެރިވާ ފަރާތްތަކުން ވެބިނާގައި ބައިވެރިވުމަށް ފޯމް ފުރުމަށް އީޕީއޭއިން އެދެއެވެ.
މިދިޔަ ޑިސެމްބަރު މަހު އެންވަޔަރަމަންޓް މިނިސްޓްރީން ވަނީ ރާއްޖޭގައި މޫދު ސަރަހައްދުގައި ދިރިއުޅޭ ދޫންޏާއި ހިޖުރަކުރާ ދޫނިތައް ދެފަރާތުން ގުޅިގެން ދިރާސާކުރުމަށް ނިއުޒިލޭންޑްއާއި އެކު އެމްއޯޔޫއެއްގައި ސޮއިކޮށްފައެވެ.
ރާއްޖޭގައި ހިމާޔަތްކޮށްފައިވާ ދޫނި ހިފައި އަނިޔާކުރާ ނަމަ ތިމާވެއްޓަށްދޭ ގެއްލުންތަކަށް ޖޫރިމަނާ ކަނޑައެޅުމާއި ބަދަލު ހޯދުމުގެ ގަވާއިދުގެ ދަށުން އެއް ދޫނި ނަމަ 20،000ރ.، އެއަށް ވުރެ އިތުރުވާ ނަމަ އިތުރުވާ ކޮންމެ ދޫންޏަކަށް 25،000ރ؛ ހިމާޔަތްކޮށްފައިވާ ދޫންޏެއް ނަމަ އިތުރުވާ ކޮންމެ ދޫންޏަކަށް 10،000ރ. އިން ޖޫރިމަނާ ކުރާނެއެވެ.
