ރައީސް އޮފީހާއި ޕީއެސްއެމް ގުޅިގެން ބޭއްވި "އަހާ" ގެ ހަތަރުވަނަ ފޯރަމްގައި މިނިސްޓަރު ވިދާޅުވީ، މިނިސްޓްރީގެ އެންމެ މުހިންމު އެއް މަސައްކަތަކީ ރާއްޖޭގައި ދެވޭ މަތީ ތައުލީމަކީ ފެންވަރު ރަނގަޅު، ރައްޔިތުން ގަބޫލުކުރާ ފެންވަރެއްގެ ތައުލީމަކަށް ހެދުން ކަމަށެވެ.
މިނިސްޓަރު ވިދާޅުވިގޮތުގައި އަމިއްލަ ކޮލެޖުތަކުން ކިޔަވައިދެނީ ކޮލިފިކޭޝަން ފްރޭމްވޯކާ އެއްގޮތަށްތޯ ބެލުމަކީ މޯލްޑިވްސް ކޮލިފިކޭޝަން އޮތޯރިޓީގެ މައިގަނޑު ޒިންމާއެއް ކަމަށެވެ. އަދި އެކަން ކަށަވަރުކުރުމުގެ މަސައްކަތް ދަނީ ކުރަމުންނެވެ.
މިނިސްޓަރު އިތުރަށް ވިދާޅުވީ، ރާއްޖޭގައި ހުނަރުވެރި ތައުލީމީ މީހުން އުފެއްދުމަށް މިނިސްޓްރީން ގިނަ މަސައްކަތްތަކެއް ކުރަމުންދާ ކަމަށެވެ. އަދި މީގެ އިތުރުން، ބޭރުގެ މީހުންނަށް މަތީ ތައުލީމުގެ ފުރުސަތުތައް ދިނުމަށް އެކްސްޕޯޓް އެޑިއުކޭޝަންގެ މަސައްކަތްތައްވެސް ކުރިއަށްދާ ކަމަށް މިނިސްޓަރު ވިދާޅުވިއެވެ.
