މެޖިސްޓްރޭޓުންގެ ހުވާކުރުމުގެ ރަސްމިއްޔާތުގައި ވާހަކަފުޅު ދައްކަވަމުން އުއްތަމަ ފަނޑިޔާރު ވިދާޅުވީ، ހުކުމް އިއްވުމުގައި އިހުސާންތެރިކަމާއެކު މަސައްކަތް ކުރި ނަމަވެސް ޖަޒުބާތުގައި ޖެހިގެން ނުވާނެ ކަމަށެވެ. އެމަނިކުފާނު މި ވާހަކަފުޅު ދެއްކެވީ 2010 ވަނަ އަހަރު މާލޭގައި ހިނގި މަރުގެ މައްސަލައެއްގައި ކުރެވުނު އުމުރު ދުވަހުގެ ޖަލު ހުކުމާ ގުޅޭ ގޮތުން އިސްތިއުނާފު މަރުހަލާގައި ނެރުނު ހުކުމާ ގުޅިގެންނެވެ.
އުއްތަމަ ފަނޑިޔާރު ވިދާޅުވި ގޮތުގައި އެ މައްސަލައިގައި ހުކުމް އިއްވުމުގެ ކުރިން އެ ރޭ މެންދަމުގެ 2 ޖަހަންދެން ނިދިފުޅު ނުކުރެއްވި އެވެ. އަދި ހުކުމާ މެދު ފުންކޮށް ވިސްނަވަން ޖެހުނު ކަމަށް ވެސް ވިދާޅުވި އެވެ.
މަރިޔަމް ނަޒާހާގެ މައްސަލައިގައި ސުޕްރީމް ކޯޓުގެ ފަސް ފަނޑިޔާރުންގެ ތެރެއިން ތިން ފަނޑިޔާރުންގެ އަގުލަބިއްޔަތުން ވަނީ އުމުރު ދުވަހުގެ ޖަލު ހުކުމް ދަމަހައްޓާފައެވެ.
