މިގޮތުން ހިރިޔާ ސްކޫލުގެ ޕްރިންސިޕަލް ރިންޒީ ވަހީދު އަމީނިއްޔާ ސްކޫލަށް ބަދަލުކުރުމަށް ނިންމާފައިވާއިރު، އަމީނިއްޔާ ސްކޫލުގެ ޕްރިންސިޕަލް ނާޒްލީން ވާފިރު ކަލާފާނު ސްކޫލަށް ބަދަލުކުރުމަށް ވަނީ ނިންމާފައެވެ. މި ބަދަލުތަކަކީ ސްކޫލުތަކުގެ ހިންގުން ހަރުދަނާ ކުރުމަށް ގެންނަ ބަދަލުތަކެއް ކަމަށް މިނިސްޓްރީން ބުނެއެވެ.
ރިންޒީ ވަހީދަކީ 2016 ވަނަ އަހަރުން ފެށިގެން ހިރިޔާ ސްކޫލުގެ ޕްރިންސިޕަލްގެ މަގާމު ފުރުއްވަމުން އައި ބޭފުޅެކެވެ. އޭގެ ކުރިން އިސްކަންދަރު ސްކޫލުގައި ޑެޕިއުޓީ ޕްރިންސިޕަލްކަމާއި ސުޕަވައިޒަރުކަން އަދި ޓީޗަރުކަން ކުރައްވާފައިވެއެވެ. ތައުލީމީ ދާއިރާގައި 30 އަހަރަށް ވުރެ ގިނަ ދުވަހު ހިދުމަތް ކުރައްވާފައިވާ ރިންޒީ މިއަދުން ފެށިގެން އަމީނިއްޔާ ސްކޫލާ ގުޅިވަޑައިގަންނަވާނެއެވެ.
ނާޒްލީން ވާފިރަކީ 35 އަހަރު ތައުލީމީ ދާއިރާގައި ހިދުމަތް ކުރައްވާފައިވާ ބޭފުޅެކެވެ. ކަލާފާނު ސްކޫލުގައި 2009 އިން 2015 އާ ހަމައަށް ޕްރިންސިޕަލްކަން ކުރައްވާފައިވާ ނާޒްލީން، އަމީނިއްޔާ ސްކޫލުގައި 10 އަހަރު ހިދުމަތް ކުރެއްވުމަށްފަހު މިހާރު އަލުން ކަލާފާނު ސްކޫލަށް ބަދަލުވެވަޑައިގަންނަވަނީ، އެ ސްކޫލުގެ ކުރީގެ ޕްރިންސިޕަލް ރަހުމާ އަބްދުއްރަހުމާން ރިޓަޔަރ ކުރެއްވުމާ ގުޅިގެންނެވެ.
