ޓޫރިޒަމް މިނިސްޓްރީގެ ތަފާސް ހިސާބުތަކުން ދައްކާ ގޮތުގައި މިދިޔަ އަހަރުގެ މި މުއްދަތުގައި އިންޑިއާއިން 22،555 ޓޫރިސްޓުން ރާއްޖެއަށް ޒިޔާރަތްކޮށްފައިވާއިރު، މި އަހަރުގެ މިހާތަނަށް އައިސްފައިވަނީ 16،727 ޓޫރިސްޓުންނެވެ. މިއީ ފާއިތުވި އަހަރާ އަޅާބަލާއިރު 25 ޕަސަންޓުގެ ދަށްވުމެކެވެ.
މިދިޔަ 2023 ވަނަ އަހަރު ރާއްޖޭގެ ޓޫރިޒަމްގެ އެއްވަނައިގައި އޮތް އިންޑިއާއިން އެ އަހަރު 209،193 ޓޫރިސްޓުން ރާއްޖެއަށް ޒިޔާރަތްކުރިއެވެ. ނަމަވެސް 2024 ގައި މިހާތަނަށް އައިސްފައިވާ ޓޫރިސްޓުންގެ އަދަދަށް ބަލާއިރު، އިންޑިއާ މާކެޓު ވަނީ ހަވަނައަށް ތިރިވެފައެވެ.
އިންޑިއާ މާކެޓު އިތުރަށް ރަނގަޅުކުރުމަށް އެމްއެމްޕީއާރުސީން ދަނީ ގިނަ މަސައްކަތްތަކެއް ކުރަމުންނެވެ. އެގޮތުން މުންބާއީގައި 100 އަށް ވުރެ ގިނަ މަޝްހޫރު ސެލެބްރިޓީންނާއި އިންފްލުއެންސަރުން ބައިވެރިކޮށްގެން "މޯލްޑިވިއަން ނައިޓް" އެއް ވަނީ ބާއްވާފައެވެ.
