މިނިސްޓަރު ޝަހީމް މިކަމަށް އެދިވަޑައިގަތީ ސަރުކާރުހެ ހަރަދުގައި އަލަށް އަޅަން ނިންމި 6 މިސްކިތެއްގެ ކުރެހުންތައް ދައްކާލުމަށްފަހުއެވެ.
މިނިސްޓަރު ޝަހީމް ވިދާޅުވީ އެންމެން ވެގެން މިސްކިތް އަޅަން ރޯދަ މަހަށްފަހު ހުޅުވާލުމުގެ ވިސްނުން ގެންގުޅުއްވާކަމަށެވެ. އަދި އަމިއްލަ ޖަމިއްޔާތަކުން މިފަދަ ކެމްޕެއިނެއް ފަށަން ގޮވާލައްވާ މިނިސްޓަރު ވިދާޅުވީ އެފަދަ ކެމްޕެއިނެއް ފަށައިފިނަމަ މިނިސްޓްރީން އެހީތެރިކަން ދޭނެކަމަށެވެ. މިނިސްޓަރުގެ ވިސްނުން ހުރީ މިސްކިތް އަޅަން ކޮންމެ ދިވެއްސެއްގެ އަތުން 1000 ރުފިޔާ ނަގަން ބާރު އަޅާ ކެމްޕެއިން ހިންގުމަށެވެ.
ޑރ ޝަހީމް ވިދާޅުވީ މި ފަދަ ކެމްޕެއިންނެއްގެ އިތުރުން ތަނަވަސްކަމުގެ އަހުލުވެރިން ގުޅިގެން ބައިވެގެން މިސްކިތް އަޅަން ބޭނުން ނަމަ އެކަމަށްވެސް ފުރިހަމަ އަށް އެހީތެރިވެދެއްވާނެކަމަށެވެ.
އަލަށް އަޅަން ފަށާ 6 މިސްކިތާއެކު، ކުރިއަށް ދާ 35 މަޝްރޫއާއެކު ސަރުކާރުން 41 މަޝްރޫއެއް ކުރިއަށް އެބަ ގެންދާކަމަށް މިނިސްޓަރު ޝަހީމް ވިދާޅުވިއެވެ. އަދި އަމިއްލަ ފަރާތްތަކުގެ ދީލަތި އެހީގައި 12 މަޝްރޫއެއް އެބަ ކުރިއަށްދާކަމަށާއި މީގެ އިތުރުން ރާއްޖޭގެ 42 ރަށެއްގައި މިސްކިތް އަޅަން ޖެހިފައިވާކަން ޑރ ޝަހީމް ފާހަގަކުރެއްވިއެވެ.
