މިއީ މި ރިޔާސީ ދައުރުގައި ރައީސް މުއިއްޒު ކުޑަހުވަދޫއަށް ކުރެއްވި ތިން ވަނަ ދަތުރުފުޅެވެ.
ރައީސް މުއިއްޒުގެ މި ދަތުރުފުޅުގައި ކުޑަހުވަދޫގައި އިމާރާތްކުރާ އާ ހޮސްޕިޓަލުގެ މަސައްކަތް ފެށުމުގެ ރަސްމިއްޔާތު ބާއްވައި، ބޭންކް އޮފް މޯލްޑިވްސްގެ އޭޓީއެމްގެ ބިންގާ އަޅުއްވައިދެއްވިއެވެ. އަދި ކުޑަހުވަދޫ ކައުންސިލާއި އަންހެނުންގެ ތަރައްގީއަށް މަސައްކަތްކުރާ ކޮމެޓީއާ ބައްދަލުކުރައްވައި، ރަށުގެ ތަރައްގީއާ ގުޅޭ މުހިންމު މަޝްވަރާތަކެއް ކުރެއްވިއެވެ.
ކައުންސިލާއެކު ބޭއްވެވި ބައްދަލުވުމުގައި، ކުޑަހުވަދޫގައި އިންޑަސްޓްރިއަލް އޭރިއާއެއް ގާއިމުކުރުމާއި، މަސް ފެކްޓްރީއެއް އެޅުމާއި، ރަށްގިރުމުގެ މައްސަލައަށް ހައްލެއް ހޯދުމަށް ކައުންސިލުން އެދުނެވެ. މި ކަންކަމާ ގުޅޭގޮތުން ރައީސް މުއިއްޒު ވަނީ އެކަންކަން ބައްލަވާނެ ކަމަށް ވިދާޅުވެފައެވެ.
އާބަން ސެންޓަރެއްގެ ގޮތުގައި ކަނޑައަޅާފައިވާ ރަށްތަކަށް ވެފައިވާ ވައުދުތައް ފުއްދުމަށް ސަރުކާރުން މަސައްކަތް ކުރިއަށް ގެންދާނެ ކަމަށް ރައީސް މުއިއްޒު ވިދާޅުވިއެވެ. މި ބައްދަލުވުމުގައި މިނިސްޓަރުންވެސް ވަނީ ކުޑަހުވަދޫގެ ތަރައްގީއަށް ކުރެވެމުންދާ މަސައްކަތްތަކުގެ މައުލޫމާތު ހިއްސާކުރައްވާފައެވެ.
