
ކުރިއަށް އޮތް ފަސް އަހަރަށް އަމާޒުކޮށް އެކުލަވާލާފައިވާ މި ޕްލޭންގައި ރާއްޖޭގެ ނަފްސާނީ ސިއްހަތުގެ ނިޒާމު ހަރުދަނާކުރުމަށް ގިނަ ކަންތައްތަކެއް ހިމަނާފައިވެއެވެ. މިގޮތުން ޕްރައިމަރީ ހެލްތު ކެއަރގެ ތެރެއިން ނަފްސާނީ ހިދުމަތްތައް ފޯރުކޮށްދިނުމުގެ ނިޒާމު ވަރުގަދަކުރުމާއި، ނަފްސާނީ ސިއްހަތާ ގުޅޭ ގޮތުން ހޭލުންތެރިކަން އިތުރުކުރުމަށް ހާއްސަ އިސްކަމެއް ދޭނެއެވެ.
މި ޕްލޭންގެ ދަށުން ނަފްސާނީ ސިއްހަތާ ގުޅޭ ސިޔާސަތުތަކާއި ގައިޑްލައިންތައް އެކުލަވާލުމާއި، ސިއްހީ ހިދުމަތްތެރިންގެ ހުނަރު އިތުރުކުރުމަށް މަސައްކަތްކުރާނެއެވެ. އަދި ނަފްސާނީ ބަލިތަކާމެދު މުޖުތަމައުގައި އޮންނަ ނޭދެވޭ ވިސްނުން ނައްތާލުމަށްވެސް މަސައްކަތްކުރެވޭނެއެވެ.
ހާއްސަކޮށް ކުޑަކުދިންނާއި އުމުރުން ދުވަސްވީ މީހުންގެ ނަފްސާނީ ސިއްހަތަށް އަހައްމިއްޔަތުކަން ދިނުމަށް މި ޕްލޭންގައި އިސްކަންދީފައިވެއެވެ. މީގެ އިތުރުން ނާޒުކު ހާލަތްތަކުގައި ތިބޭ މީހުންނަށް ބޭނުންވާ އެހީތެރިކަން ފޯރުކޮށްދިނުމަށްވެސް ހާއްސަ ސަމާލުކަމެއް ދެވޭނެއެވެ.