ރަސްމީ ފާލަން ހުޅުވުމަށް މިރޭ އޮތް ހަފްލާގައި ވާހަަކަފުޅުދައްކަވަމުން ރައީސް ވިދާޅުވީ މިއަދު ނެރެވުނު ފްލެޓް ލިސްޓަކީ އެ މަނިކުފާނު ގެދޮރުވެރިކަމުގެ މަސައްކަތުގައި މަސައްކަތްކުރައްވަން ފެށި އެންމެ ޖޫނިއާ ދުވަސްވަރުން ފެށިގެން މިއަދާ ހަމައަށް ބަލާއިރު ވެސް ނެރޭނެ އެންމެ އިންސާފުވެރި ލިސްޓު ކަމަށެވެ.
ރައީސް ޑރ. މުއިއްޒަކީ އެންމެ ގިނަ ދުވަހު ހައުސިން މިނިސްޓަރުކަމުގެ މަގާމު އަދައިކުރެއްވި ބޭފުޅާއެެވެ. އެގޮތުން ކުރީގެ ރައީސް މުހައްމަދު ވަހީދުގެ ވެރިކަމާއި، ކުރީގެ ރައީސް އަބްދުﷲ ޔާމީންގެ ވެރިކަން ނިމެންދެން ވެސް ހައުސިން މިނިސްޓަރަކީ ރައީސް ޑރ. މުއިއްޒެވެ.
ރައީސް ޔާމީންގެ ފަސް އަހަރު ހިންގި އެންމެ ބޮޑު ހައުސިން މަޝްރޫއުކަމަށްވާ ހިޔާގެ މަސައްކަތް ވެސް ކުރެވުނީ އޭރު މިނިސްޓަރުކަމުގައި ހުންނެވި މިހާރުގެ ރައީސް މުއިއްޒުގެ ބެއްލެވުމުގެ ދަށުންނެވެ.
ހިޔާ ފްލެޓް ލިސްޓުތަކާއި، ޔާމީންގެ ވެރިކަމުގައި ދޫކުރި އެހެން ފްލެޓްތަކުގެ ލިސްޓުތަކުގެ ސައްހަކަމާމެދު އެއިރު ބޮޑެތި ފާޑުކިޔުންތައް އަމާޒުވި އެވެ.
ރައީސް ވިދާޅުވީ ފްލެޓް ލިސްޓު ރިވިއުކުރީ ކުރީ ސަރުކާރުން އެކުލަވައިލި ކަންކަމުގެ މައްޗަށް ބަލައިގެން ކަމަށެވެ. މި ސަރުކާރުން އެއްވެސް އާ ޝަރުތެއް އިތުރުކޮށްފައި ނުވާނެ ކަމަށް ވެސް ރައީސް ވިދާޅުވި އެވެ.
މީގެއިތުރުން ރައީސް ވަނީ ގަސްދުގައި އެއްވެސް ރައްޔިތަކު ފްލެޓް ލިސްޓުން އުނިކޮށްފައިނުވާނެ ކަމަށްވެސް ވިދާޅުވެފަ އެވެ. އަދި ލިސްޓުގައި ނެތް ރައްޔިތުންގެ ތެރެއިން ޝަކުވާއެއް އޮތް ރައްޔިތަކަށް ޝަކުވާ ހުށަހެޅުމުގެ ފުރުސަތު އޮންނާނެ ކަމަށާއި އެއްވެސް ސަބަބަކާ ހުރެ ލިސްޓުން އުނިވެފައިވާކަމަށް ސާބިތުވާނަމަ އެ ފަރާތަކަށް ފްލެޓް ހަމަޖެހޭނެ ކަމަށްވެސް ވިދާޅުވި އެވެ.
މި ސަރުކާރަކީ ހަމަހަމަކަމާއި އެކު ހިދުމަތްކުރަން އައި ސަރުކާރެއްކަން ފާހަގަކުރައްވާ ރައީސް މުއިއްޒު ވަނީ މީހަކަށް ލިބިފައި އޮތް އެއްޗެއް މި ސަރުކާރުން އަތުނުލާނެކަން ތަކުރާރު ކުރައްވާފަ އެވެ.
