
މި ސްކޭމް ހިންގަމުން އަންނަނީ ފޭސްބުކްގައި "މޯލްޑިވްސް ޕަބްލިކް ޓްރާންސްޕޯޓް"ގެ ނަމުގައި ހިންގާ ޕޭޖަކުން ކަމަށް އެމްޓީސީސީން ބުނެއެވެ.
އެކުންފުނިން ނެރުނު ބަޔާނެއްގައި ބުނީ އެ ޕޭޖުން ދަނީ އާރުޓީއެލް މެދުވެރިކޮށް ތިން މަސްދުވަސް ވަންދެން ހިލޭ ދަތުރުކުރުމަށް މަގުފަހިކޮށްދޭނެ ކަމަށް ބުނާ "ސްމާޓް ކާޑެއް "ވިއްކުމުގެ މަސައްކަތްކުރަމުންކަމަށެވެ.
ފޭސްބުކް އެ ޕޭޖުގައި ހިންގަމުން ގެންދާ އެއްވެސް ކަމަކީ އެމްޓީސީސީ އާއި އާރުޓީއެލްއާ ވެސް އެއްވެސް ގުޅުމެއް ނެތް ކަމެއް ކަމަށް އެކުންފުނިން ބުނެއެވެ.
އެމްޓީސީސީގެ ފަރާތުން އާ ހިދުމަތެއް ނުވަތަ ޕްރޮޑަކްޓެއް ތައާރަފުކުރާ ނަމަ އެ ކަމެއް ރަސްމީކޮށް ފެށުމުގެ ކުރިން ކުންފުނީގެ އޮފިޝަލް ސޯޝަލް މީޑިއާ އަދި އެހެނިހެން މީޑިއާ ޗެނަލްތަކުން އެކަމުގެ މައުލޫމާތު ހިއްސާކުރާނެކަމަށްވެސް އެމްޓީސީސީން ނެރުނު ބަޔާނުގައިވެއެވެ. އަދި މި ފަދަ ސްކޭމްތަކަށް ސަމާލުވުމަށް އެމްޓީސީސީން ވަނީ އިލްތިމާސްކޮށްފައެވެ
އެ ކުންފުންޏަށް ރައްޔިތުން ކުރާ އިތުބާރުގެ ބޭނުން ނަހަމަ ގޮތުގައި ހިފައި، ނުހައްގުން ފައިސާ ހޯދުމަށް ކުރާ މި ކަހަލަ ނާތަހުޒީބު އަމަލުތައް ހަރުކަށި އިބާރާތުން ކުށްވެރިކުރާ ކަމަށް އެމްޓީސީސީގެ ބަޔާނުގައިވެއެވެ.