ނަމަވެސް އުސައިދު ފުލުހުންގެ ބެލުމުގެ ދަށަށް ގެންދިޔަ ސަބަބު އަދި ހާމަކޮށްފައެއް ނުވެއެވެ.
އުސައިދު ގެއްލިގެން ހޯދަން ފަށާފައިވަނީ މިދިޔަ ހޯމަ ދުވަހުންނެވެ. އޭނާގެ ބައްޕަ އިބްރާހީމް އަފީފްގެ ހާމަކޮށްފައިވާ މައުލޫމާތުން، އުސައިދު ފަހުން ފެނިފައިވަނީ މިދިޔަ އާދިއްތަ ދުވަހުގެ 15:15ގައި 'ސަންވޭ ޖީއޯ' އިން ނުކުމެގެން ދިޔަތަނެވެ. އުސައިދުގެ ހަބަރެއް ނުވުމާއި ގުޅިގެން އާދިއްތަ ދުވަހުގެ ރޭ 22:00ގައި މެލޭޝިއާ ޕޮލިހަށް މައްސަލަ ހުށަހެޅުނެވެ. ހަމަ އެދުވަހު މެލޭޝިއާގައި ހުންނަ ދިވެހިރާއްޖޭގެ ހައި ކޮމިޝަނަށްވެސް މި މައްސަލަ ރިޕޯޓު ކުރެވުނެވެ.
ސީސީޓީވީ ކެމެރާ ފުޓޭޖުތަކުންނާއި އެކި ފަރާތްތަކުން ލިބުނު މައުލޫމާތުން، އުސައިދު އާދިއްތަ ދުވަހުގެ 16:00 ހާއިރު ރާއްޖޭގެ އެމްބަސީއަށް ގޮސްފައިވާކަން އެނގިފައިވެއެވެ. ނަމަވެސް އެދުވަހަކީ ބަންދު ދުވަހަކަށް ވުމާއެކު، އެމްބަސީގެ އެއްވެސް މުވައްޒަފަކާ އުސައިދަށް ބައްދަލުވެފައި ނުވާކަމަށް އޭނާގެ ބައްޕަ ބުނެފައިވެއެވެ. އުސައިދުގެ ވޮލެޓާއި ސްޓޫޑަންޓް ކާޑު ފެނިފައިވާކަމަށާއި އުސައިދު ހުރީ ހެޔޮ ހާލުގައިކަން ޔަގީންކުރެވިފައިވާކަމަށް އޭނާގެ ބައްޕަ މައުލޫމާތު ދީފައިވެއެވެ.
ފޮރިން މިނިސްޓްރީން އިއްޔެ ހާމަކުރި ގޮތުގައި، މެލޭޝިއާގައި ދިވެއްސަކު ގެއްލިގެން އުޅޭކަމުގެ މައުލޫމާތު ލިބިފައިވެއެވެ. އެއަށްފަހު ގިނަ ބަޔަކު ސޯޝަލް މީޑިއާގައި އުސައިދުގެ ފޮޓޯ ހިއްސާކޮށް، އޭނާއާ ގުޅުންހުރި މައުލޫމާތެއް އެނގޭނަމަ ރާއްޖޭގެ ހައިކޮމިޝަނާ ހިއްސާކުރުމަށް އެދިފައިވެއެވެ.
