ފުލުހުން މައުލޫމާތު ދިން ގޮތުގައި ހައްޔަރުކުރެވުނީ 44 އަހަރުގެ ސޮފިގުލް އިސްލާމް ނަމަކަށް ކިޔާ ބަންގްލަދޭޝް މީހެކެވެ.
މި މަހުގެ 5 ވަނަ ދުވަހު ކައުންޓާ ނާކޮޓިކްސް އިންޓެލިޖެންސާއި ޑްރަގް އެންފޯސްމަންޓު ގުޅިގެން ހިންގި އޮޕަރޭޝަނެއްގައި މާލޭ މަގުމަތިން އޭނާ ހުއްޓުވައި ބަލައިފާސްކުރެވުނެވެ. އަދި އޭނާ ދިރިއުޅޭ ގެ ބަލައިފާސްކުރުމުން 18 ފުޅި ބަނގުރާ ފެނިފައިވެއެވެ.
ސަރުކާރުން ފާއިތުވި ދުވަސްތަކުގައި އިއުލާން ކޮށްފައިވާ އާ އުސޫލާ އެއްގޮތަށް، ގަވާއިދާ ހިލާފަށް ބަނގުރާ ގެންގުޅެ ވިއްކާ ބިދޭސީން ހައްޔަރުކުރެވުމަށްފަހު 24 ގަޑިއިރުތެރޭ ޑީޕޯޓްކުރެވޭނެ އިންތިޒާމު މިހާރު ވަނީ ހަމަޖެހިފައެވެ. މިއީ އެ އުސޫލުގެ ދަށުން ޑީޕޯޓްކުރެވޭ ފުރަތަމަ ބިދޭސީ ކަމަށް ބެލެވެއެވެ.
ރައްޔިތުންގެ މަޖިލީހުގެ ފުރަތަމަ ދައުރުގެ ފުރަތަމަ ޖަލްސާގައި ރިޔާސީ ބަޔާން އިއްވަމުން ރައީސް ޑރ. މުއިއްޒު ވިދާޅުވި ގޮތުގައި ގައުމުގެ އިގްތިސާދު ކުރިއެރުވުމަށް އޮތް އެއް ބޮޑު ހުރަހަކީ ޑްރަގުގެ ވަބާއެވެ. އަދި މަސްތުވާތަކެތި ބޭނުންކޮށް، ގެންގުޅެ، އެ ތަކެތީގެ ވިޔަފާރިކޮށް، ގަވާއިދާ ހިލާފަށް ބަނގުރާ ގެންގުޅެ ވިއްކާ ބިދޭސީން ހައްޔަރުކޮށް، 24 ގަޑިއިރުތެރޭ ޑީޕޯޓްކުރެވޭނެ އިންތިޒާމު މިހާރު ވަނީ ހަމަޖައްސާފައެވެ.
